Protesta e studentëve vijon prej 6 ditësh para Ministrisë së Arsimit dhe një prej protestueseve më aktive është Mirela Ruko, pjesë e Lëvizjes për Universitetin.
“Ne duam vetëm të realizohen kërkesat që kanë studentët”, shprehet Ruko, duke hedhur poshtë interpretimet se Lëvizja për Universitetin ka qëllime të tjera siç është pasyruar në media.
E pyetur se si nisi e gjithë protesta ajo shprehet se Lëvizja për Universitetin i ka ndihmuar studentët e Arkitekturës, por kanë qenë studentët vetë që kanë nisur protestën fillimisht. “Kjo protestë është shumë më e madhe se Lëvizja apo se forumet e ndryshme, është shumë më tepër se kaq”, shton Mirela.
Mirela Ruko ka treguar edhe diferencën midis Lëvizjes për Universitetin dhe Organizatës Politike.
“Lëvizja për Universitetin përbëhet nga studentë të të gjitha universiteteve publike në Shqipëri dhe nuk mund të lidhësh çdo aktivist të Lëvizjes për Universitetin me Organizatën Politike. Aktivistët e Lëvizjes për Universitetin kanë qëllime vetëm përsa i përket arsimit. Nuk kanë pse të hedhin baltë mbi ta, jo më kë janë, çfarë bëjnë ose nuk bëjnë. Aktivistët e Lëvizjes për Universitetin janë studentë, të cilët protestojnë për një arsim më të mirë. Akuzat që na lidhin me Organizatën Politike bëhen thjesht për të hedhur baltë mbi ne, ndërkohë që ne kemi kaq kohë që protestojmë për Reformën e Arsimit të Lartë, për kushtet, për korrupsionin, për diskutime me studentët etj. Nuk e dimë kush po e kurdis gjithë këtë përbaltje që po na bëjnë. Është e padrejtë dhe e turpshme”, shprehet Ruko.
Shumë studentë kanë pranuar dhe kanë mirëpritur një bashkim të mundshëm të protestës me banorët e “Astirit” ose me aktivistët për mbrojtjen e Teatrit.
“Ata po japin mendimin e tyre. Bashkarisht duhet të dalim me një qendrim. Kur ta vendosim qendrimin e përbashkët do e bëjmë publike. Nuk ka rëndësi qëndrimi im personal, duhet të dëgjoj dhe studentët e tjerë. Ne nuk e dimë nëse ka prapaskena apo jo. Nuk e dimë se kush po vjen, kush po flet dhe me çfarë qëllimi po flet. Unë kam qenë te protestat për Teatrin sepse mendoj se është një kauzë e drejtë. Të bashkohen apo jo protestat, nuk e vendos unë”, shprehet për çështjen Mirela.
