Policia deklaron se ka asgjësuar sot mbi 20 mijë rrënjë marijuanë në një zonë buzë kufirit me Greqinë në rrethin e Sarandës si dhe në Vlorë. Policia tha se nuk ka mundur që të arrestojnë pronarët e kësaj sasie të madhe lëndësh narkotike dhe nuk ka dhënë hollësi për hetimet.
Sipas burimeve policore bimët e marijuanës ishin mbjellë në zonën e Karroqit, përballë “Piramidës 51”, të kufirit shqiptaro grek. Policia tha se 15.000 rrënjë ishin të mbjella në kubikë, ndërsa 5.000 rrënjë ishin të mbjella në tokë, me lartësi nga 5 cm deri në 30 cm.
Policia bëri asgjësimin e tyre me djegie.
Një ditë më parë në afërsi të fshatit Karroq policia shkatërroi edhe 10 mijë bimë të tjera marijuane. Policia nuk ka dhënë hollësi nëse ky aktivitet lidhet me grupe kriminale apo banorë të zonës.
Mijëra bimë kanë nisur të zbulohen në zonat në Jug të Shqipërisë ndërkohë që policisë do ti duhen energji të mëdha dhe forca të shumta policore në terren për të përballuar këtë ritëm kultivimi që po shfaqet.
Aktualisht, sipas ekspertëve të antidrogës, përmasat e kultivimit nuk janë të lexueshme qartë pasi marijuana është e mbjellë në kubikë të vegjël që fshihen lehtësisht në sipërfaqe të vogla, por nëse bimetdo të arrihet të mbillen në sipërfaqe toke, vatrat pritet të jenë të mëdha dhe beteja me marijuanën pritet të jetë një sfidë e vërtetë për policinë dhe njësitë vendore, shkruan VOA.
Përveç kryetarit të Bashkisë së Mallakastërs asnjë nga administratorët vendorë nuk është përfshirë deri tani në operacione kundër kultivuesve.
DEKLARATA E POLICISË SË VLORËS
Asgjësohen në total 28.030 bimë narkotike “Cannabis sattiva” në Vlorë dhe Sarandë.
Në fshatin Resulaj-Vlorë, Policia ka zbuluar dhe asgjësuar 1.000 rrënjë bimë narkotike “Canabis” të mbjella në anë të lumit, me lartësi nga 5 cm deri në 10 cm.
Në fshatin Sevaster-Vlorë, Policia ka zbuluar dhe asgjësuar 530 rrënjë bimë narkotike “Cannabis”, të mbjella në vendin e quajtur “Pylli Dobre”, prej të cilave: 220 rrënjë ishin të mbjella në kubikë dhe 310 rrënjë të tjera të mbjella në tokë, me lartësi nga 5 cm deri në 20 cm.
Policia e Sarandës në bashkëpunim me Policinë Kufitare, gjatë kontrollit të përbashkët për evidentimin e kultivimit të bimëve narkotike, në vendin e quajtur “Ish-Posta Kufitare Perdhikal”, kanë zbuluar dhe asgjësuar në total 26.500 rrënjë bimë narkotike “Canabis”, prej të cilave:
3.500 rrënjë bimë narkotike “Cannabis” ishin të mbjella në tokë me lartësi 5 cm deri në 40 cm.
– 23.000 rrënjë bimë narkotike “Cannabis”, prej të cilave: 15.000 kubikë dhe 8.000 rrënjë të tjera ishin të mbjella në tokë, në fshatin Karroq, me lartësi nga 5 cm deri në 30 cm.
Policia bëri asgjësimin e tyre me djegie. Punohet për identifikimin dhe kapjen e kultivuesve.
Gjate veprimeve hetimore, Policia ka bërë të mundur identifikimin e njërit prej kultivuesve të 5841 bimëve narkotike që u asgjësuan në fshatin Ninat-Konispol, më datë: 14.05.2016, një 52-vjeçar të cilin e ka shpallur në kërkim. Punohet për kapjen dhe arrestimin e tij.
