Studentët e Universiteti të Tiranës dhe të Politeknikut po protestojnë përpara Ministrisë së Arsimit, për të kërkuar anulimin e tarifës për provimet e prapambetura.
Protesta nisi në Universitet rreth orës 09:30 dhe më pas ata marshuan drejt Ministrisë së Arsimit ku aktualisht (ora 10:29) janë ulur këmbëkryq dhe me megafon i bëjnë thirrje ministres së Arsimit Lindita Nikolla “Të anulojë vendimin”.
“Jam student që nuk frikësohem/ Rezistenca nuk ndalohet” thërrasin studentët me megafon duke shtuar se nuk do largohen pa u takuar me ministren dhe kjo e fundit të anulojë vendimin. Studentët kanë bllokuar edhe rrugën përpara ministrisë së Arsimit.
“Duhet të paguajmë 6500 lekë për çdo kredit të prapambetur. Është hequr mundësia për të paguar tarifën vjetore me këste”, kanë deklaruar studentët.
Sipas tyre, tarifa është e lartë dhe nuk mund të paguhet vetëm me një këst.
Në një moment përfaqësuesit e ministrisë, me në krye zv/ministren e Arsimit, Besa Shahini dolën dhe i kërkuan disa studentëve të futen brenda ministrisë dhe të përgatisin një listë me kërkesat e tyre. Por kjo u refuzua nga studentët duke i kërkuar që ministrja të dalë jashtë të flasë me ta.
“Këta kërkojnë nga ne atë që dinë të bëjnë më së miri. Të na ulin në tavolinë dhe të bëjmë negociata dhe në fund të bëjnë atë që kanë bërë gjithmonë”, tha një student.
Pedagogu thirrje studentëve: Bashkohuni me ata që po u vjedhin banesat, ndryshe nuk ka zgjidhje
Pedagogu i Fakultetit të Drejtësisë, Ermir Dobjani ishte në krah të studentëve në protestën që po mbahet para ministrisë së Arsimit.
Përmes megafonit, Dobjani, i cili ka mbajtur dhe postin e Avokatit të Popullit i bëri thirrje studentëve të vijojnë protestën, madje të bashkohen me banorët që po u prishet banesa për shkak të projektit të Unazës së Madhe.
“Në Ministrinë e Arsimit është vënë një kriminele jo ministre, sepse vazhdon politikën kriminale të Edi Ramës. Kanë vrarë të gjithë diplomat e universiteteve të huaja. Nëse keni vendosur të fitoni të drejtat tuaja nuk bëhen të lutur dhe të puthur, por me bojkotim total të studimeve. Këta nuk njohin logjikë por njohin dhunën. Bashkohuni protestave të atyre që po ua vjedhin shtëpinë, ndryshe nuk ka zgjidhje.’
