Klodeta Dibra është zgjedhur kryetarja e re e Forumit të Gruas në Partinë Socialiste, duke mposhtur në garë konkurrentet Etilda Muhaj, Voltiza Prendi dhe Zana Sina.
Dibra ishte kandidate në vitin 2016-të për të marrë drejtimin e Universitetin e Tiranës, por humbi përballë Mynyr Konit, i cili u zgjodh rektor i këtij institucioni. Ishte pikërisht kjo garë që e vendosi Dibrën në qendër të vëmendjes së medias, por jo për shkak të platformës, për prej përfshirjes së Emiljano Shullazit, i dënuar me 14 vite burg si kreu i një grupi kriminal.
Ish-kryeministri Sali Berisha denoncoi publikisht kërcënimin e Konit nga Shullazi, me qëllim që kandidati të braktiste garën dhe të favorizohej Klodeta Dibra. Denoncimi i Berishës solli arrestimin e Shullazit.
Kandidatja për postin e rektores i konsideroi pretendimet për kërcënimin e Mynyr Konit si “të stisura nga shkatërruesit e universitetit.”
Por edhe pse nuk u zgjodh në krye të Universitetit të Tiranës, historia e Dibrës me çështjen ‘Shullazi’ nuk përfundoi aty. Rreth dy muaj më pas, ajo u thirr në Prokurorinë e Krimeve të Rënda për t’u marrë në pyetje. Përballë prokurorëve Elizabeta Imeraj dhe Ened Nakuçi, Klodeta Dibra mohoi të kishte dijeni për kërcënimin e Konit dhe mohoi gjithashtu se kishte njohje me Emiljano Shullazin.
Dy vite pas kësaj ngjarjeje, Klodeta Dibra merr drejtimin e një strukture të rëndësishme brenda Partisë Socialiste, e cila drejton e vetme vendin.
Në një postim në ‘Facebook’, ajo shprehet:
Pas një gare të bukur, dinjitoze, qytetare e fisnikërishte vjen edhe fitorja spektakolare.
Të dashura mikesha, gra e vajza të Forumit të Gruas socialiste:
Sot më dhatë besimin të jem Kryetarja e Forumit të grave dhe vajzave socialiste sepse besuat tek vizioni im;
Sot shprehët vullnetin tuaj me votë demokratike duke dëshmuar se jeni pjesa më e dlirë dhe e jashtëzakonshme e shoqërisë shqiptare;
Sot fitoi skuadra jonë, fryma e sinqertë dhe bashkëpunuese e grupit, guximi dhe vullneti për t’i shkuar garës deri në finish. Nga kjo garë nuk pati humbës dhe të humbur;
Jam e lumtur që ju takova, që kuvenduam, që ndamë ide e mendime, që u pamë sy më sy, që u rrokëm, që i shtrënguam dorën njëra-tjetrës;
Sot është veçse fillimi i një rrugëtimi të gjatë.
Dua t’ju falenderoj të gjithave një e nga një, sepse secila prej jush është vlerë për shoqërinë tonë.
Falenderoj kandidatet Zana dhe Voltiza për garën e bukur dhe dinjitoze dhe për sportivitetin e treguar.
Falenderoj pafundësisht Alketën, Dorinën, Gertën, Gentën, Enin, Jolezën, Gerta Hoxhën, Gentianën, Evën, Abikelën, Natalinën, Karolinën, Teutën, Lauretën, Xhenin, Aidën, Sarën, Lirinë.
Falenderoj të gjitha koordinatoret e grave të 24 njësive për punen e shkëlqyer dhe procesin e përsosur që menazhuan sot me përkushtim e profesionalizëm.
Falenderoj anëtaret e komisioneve për korrektesën dhe frymën demokratike që dëshmuan përgjatë gjithë ditës.
Falenderoj administratoret e njësive dhe strukturat e tjera për krijimin e lehtësirave në mirëmenazhimin e procesit.
Falenderoj ju, miqtë e mikeshat e mia në fb e jo vetëm që me mesazhet e panumërta, telefonatat e pambarimta më dhatë forcë për të besuar tek fitorja.
Dhe në fund, falenderoj familjen time që më ka mbështetur në çdo sfidë timen.
Sot mori udhë rrugëtimi ynë me gratë për gratë, me vajzat për vajzat.
Përulësisht
Klodeta Dibra
