Kryetari i Partisë Demokratike, Lulzim Basha, tha se mungesa e mundësive është një nga problemet kryesore të të rinjve sot në Shqipëri.
I ftuar në forumin “Studentët për qeverisjen e mirë”, Basha fajësoi sistemin për të cilin tha se është kapur nga një grup njerëzish.
“Problemi numër një është problemi i mungesës së mundësive.
Dhe sot 8 në 10 të rinj provojnë të largohen nga vendi i tyre drejt një të panjohure. Synojnë të largohen drejt një realiteti ku synojnë të gjejnë mundësi për veten e tyre.
Sistemi është kapur përsëris. Janë një grusht njerëzish që kanë kapur sistemin”, u shpreh Basha.
Para të rinjve, kreu i demokratëve solli në vëmendje atë se çfarë po ndodh tek Unaza e madhe për të cilën tha se janë shkelur tre parimet bazë të mirëqeverisjes.
“Janë shkelur tre parime bazë të mirëqeverisjes, me 40 milionë euro çfarë mund të bëhej për arsimin e lartë. 40 milionë euro është i gjithë buxheti i ndihmës sociale në Shqipëri.
I gjithë buxheti i subvencioneve të bujqësisë është sa një kilometër i kësaj unaze”, u shpreh Basha.
