Prokuroria e Krimeve të Rënda ka kërkuar 12 vite burg për Sajmir Cullhajn, i cili tentoi të kalonte armë drejt Anglisë nëpërmjet aeroportit të Rinasit me anë të pakove postare.
Kërkesa e Prokurorisë vjen pas zgjatjes së hetimeve më 23 gusht të këtij viti ndërkohë që ai ndodhej nën masën e sigurisë “arrest me burg”.
Burime bënë me dije se hetimet për këtë çështje u zhvilluan në bashkëpunim me palën angleze, ndërkohë që bashkë me Cullhajn po hetohej edhe Neritan Faria, i cili është shpallur në kërkim nga autoritetet shqiptare.
Ngjarja e vitit 2017
Në 24 gusht 2017, në aeroportin e Rinasit,u kapën 3 pako të kompanisë DHL, në të cilat ndodheshin tre armë që u zbuluan nga dogana e Rinasit.
Pas kapjes së armëve, Policia arrestoi Sajmir Cullhajn, 32 vjeç, nga Shijaku, i dënuar më herët për trafik droge, ndërsa Neritan Farian, 47 vjeç, nga Durrësi e shpalli në kërkim.
Edhe gjurmët e tij të gishtave u gjetën në pakot DHL, Cullhaj mohoi përfshirjen e tij në këtë rrjet duke pretenduar se nuk e dinte çfarë kishte brenda në pako, dhe se po niste një dërgesë tek miku i tij në Angli.
“Një miku im me emrin Tani ma dha që ta postoja për në Britani. Unë nuk e di se çfarë kishte brenda. Bëra dorëzimin në postë dhe u largova me makinën e shokut tim. Kur u arrestova u njoftova edhe për atë që kishte brenda në pako”,-tha Cullhaj para gjykatës.
