Ditën e sotme dy prej banorëve të zonës së Astirit Dorian Protoduari dhe Marsela Lekli kanë mbërritur në Prokurorinë e Tiranës për të dorëzuar një padi kundër kreut të Bashkisë së Tiranës Erion Veliaj, ARRSH-së dhe INUK-ut. Edhe dje ata mbërritën në Prokurori për padinë, po nuk i priti askush nga përfaqësuesit e organit të akuzës.
Ata kërkojnë që institucioni i prokurorisë të hetojë lidhur me procedurat që janë ndjekur në rastin e vendimit për prishjen e banesave të tyre.
Nga ana tjetër banorët e tjerë po zhvendosen drejt rrethrrotullimit të Doganës pasi ka informacione se atje kanë mbërritur fadromat e INUK të cilat kanë nisur prerjen e pemëve, çka mund t’i hapë rrugë më pas dhe prishjes së banesave të tyre.
Edhe dje banorët u treguan të vendosur në qëndrimin e tyre, se ata do të mbrojnë me jetë banesat, ndërsa iunstitucionet nuk kanë bërë asnjë hap pas.
Ministri Gjiknuri dhe kreu i Bashkisë së Tiranës Veliaj, kanë thënë se banorët që nuk kanë lejen e legalizimit të banesave të tyre, do tiu sigurohet tre vjet qera falas, ndërsa personat që kanë leje do të kompesohen sipas ligjit.
Ndërkohë që së fundi mësohet se ARRSH ka kërkuar një grup përfaqësues nga unaza e re për takim.
