Deputeti socialist sërish i ka drejtuar kritika qeverisjes, për të cilën tha se nuk pranon asnjë faj apo gabim. Në debate me kolegët, Erion Braçe de Arben Ahmetaj, Blushi iu ka dhënë një këshillë. Ai tha se “Edi Rama do të vazhdojë të lyejë me bojë gërmadhën e Saliut, por mos ia mbani bojërat se do të bëheni pis me të”.
Ndërsa duke iu përgjigjur Braçes i cili tha se fajin për aksidentin në Kavajë ku humbën jetën 2 fëmijë e ka gjykata e Kavajës që ka urdhëruar heqjen e trafikndarësit, Blushi tha se gjykata nuk shkon tek trau.
Nga ana tjetër ministri Financave, Arben Ahmetaj tha se ekonomia po vuan pasojat e ndikimeve të jashtme duke iu referuar zhvillimeve në vendet fqinje.
Por ja si është përgjigjur Blushi, i cili nuk ka lënë jashtë akuzave të tij as kreun e bashkisë Kavajë, Elvis Rroshin.
“Për aksidentin në Kavajë u tha ‘e ka fajin gjykata”, po nuk shkon gjykata te trau. Për borxhin publik “e ka fajin Saliu”. Për konsumin “e ka fajin Italia”. Për papunësinë “e ka fajin Greqia se kthehen të papunët, se i dëbon Cipras”. Për emigracionin “e ka fajin Gjermania se ka vënë magnet punësimi Merkel”. Për humbjen e kombëtares “e ka fajin Serbia”. Për pronat “e ka fajin Strasburgu”. Dakord e zëmë e se janë të vërteta. Po ju a keni ndonjë faj? A keni ndonjë përgjegjësi? A ka ndonjë burrë këtu mes jush? Prisnim që rritja ekonomike të ishte 3.2. Prisnin punësim, prisnim investime. Prisnim që shkollat të ishin më të mira por janë më dobët. Një kryetar bashkie ka një vit që akuzohet, jo nga këta se këta janë të pabesueshëm. Në formularin e dekriminalizimit tha se ka harruar se për çfarë është dënuar. Ka dy mundësi ose gënjen ose është dënuar 1 mijë herë. Ky njeri që thotë nuk mbaj mend se nuk janë dënuar, gënjen shtetin e vet dhe mbahet në detyrë është e kundërta me një zonje aty (Hafizi)”, tha Blushi.
Por sërish Ahmetaj ka kërkuar falje për qeverinë e kaluar. “Qeveria nuk ka asnjë arsye pse të fajësohet. U themi të gjithë shqiptarëve na falni për ato që nuk kanë bërë ata që ikën. Me reforma që ka bërë u ka kthyer shqiptarëve shpresën. Shpresën ia vrasin këtu me qëllim”, përfundoi Ahmetaj.
