Policia dhe Prokuroria bien në gjurmë të personit që dyshohet se ekzekutoi Edison Harizajn dhe shokun e tij Genci Caci pak ditë më parë në Durrës. Sipas asaj që raporton televizioni Report Tv, hetuesit kanë dyshime se vrasja e Harizajt është kryer nga një shqiptar i cili jeton jashtë Shqipërisë. Ky person, i cili ka pasur rolin e vrasësit me pagesë dhe mendohet se ka hyrë ilegalisht në Shqipëri pak ditë para vrasjes së Harizajt.
Sipas të njëjtave burime autori i dyshuar është një person i njohur për drejtësinë, pasi ai ka qenë i dënuar më parë për disa vrasje në vend dhe ishte pjesë e një bande të rrezikshme në qytetin e Vlorës. Vrasësi me pagesë mendohet se strehohej në Belgjikë dhe ka ardhur në Shqipëri vetëm për të ekzekutuar Edison Harizajn. Të njëjtat burime saktësojnë se personi që dyshohet se kreu vrasjen, pavarësisht se ka qenë i arrestuar në Shqipëri, ia ka arritur të dalë nga burgjet shqiptare.
Edison Harizaj i njohur me disa nofka si “Il Padrino”, “Edisoni i 7 pallateve”, ose “Edi faqedjeguri” u ekzekutua 6 ditë më parë në Durrës dhe mendohet se në vrasjen e tij morën pjesë 5 persona. Fillimisht Harizaj u ndoq nga një makinë, ndërsa automjeti tjetër i bëri pritë.
Më shumë se 50 plumba u qëlluan në drejtim të makinës së Harizajt i cili gjithashtu dyshohej si autor i disa ngjarjeve në Vlorë, duke filluar nga vrasja e gjyqtarit Skerdilajd Konomi, deri tek zhdukja e Albano Xhafferit, pak muaj më parë në qytetin bregdetar. 39-vjeçari njihet si mik i Emiljano Shullazit dhe dyshohej si kreu i një grupi kriminal të rrezikshëm në Vlorë.
