Gjykata e Tiranës ka sekuestruar pasuritë e firmës “Stargold Albania”, në pronësinë e tre shtetasve italianë. Andrea Tufariello, Pietro Cosentino dhe Domenico Papalia regjistruan në QKR këtë shoqëri, me qëllimin për të tregtuar flori mes Shqipërisë, Maqedonisë dhe Italisë. Sipas vendimit që disponon Bold News, rezulton se këta persona dyshohet se janë anëtarë të klanit mafioz kalabrez Ndragheta dhe qëllimi i hapjes së kësaj firme ka qenë pikërisht pastrimi i parave. Deri më tani ata pastruan në Shqipëri rreth 750 mijë euro.
Ndërkohë, gjykata i sekuestroi 141 822 euro dhe 53 008 lekë. Mësohet se më 2 shtator 2015 është regjistruar shoqëria “Stargold Albania” me ortak Andrea Tufariello dhe Pietro Cosentino me 50 % të aksioneve secili. Objekti i saj është kryerja e çdo aktiviteti të ligjshëm në lidhje me tregtimin dhe përpunimin e arit dhe nënprodukteve të tij përfshi, por pa u kufizuar, në blerjen, shitjen, transferimin, transformimin, disponimin, posedimin e tij etj. Kjo shoqëri e ka qendrën në Tiranë, rruga “Dëshmorët e 4 shkurtit”.
Nga provat e siguruara rezulton se në llogari të subjektit tregtar “Stargold Albania” sh.p.k janë depozituar në vazhdimësi shuma të konsiderueshme monetare, të cilat sipas faturave rezultojnë se kanë lidhje me shitje të floririt nga kjo shoqëri, kryesisht te subjekti Esposito Preziosi srl Itali. Shumat e depozituara për llogari të shoqërisë Stargold Albania sh.p.k pranë një banke të nivelit të dytë nga subjekti Esposito Preziosi srl Itali për periudhën shkurt 2006 – prill 2006 rezultojnë 561 644 euro. Më datë 7 prill 2016 konstatohet se pranë të njëjtës bankë është transferuar shuma 190 000 euro nga ana e subjektit Star Dust 2015 DOO Maqedoni, me të njëjtin përshkrim, shitje floriri nga subjekti Stargold Albania.
Në vendim thuhet se gjatë hetimeve paraprake është administruar informacioni nga misioni Interforcë Itali sipas të cilit ortakët e subjektit Stargold Albania sh.p.k janë persona të sinjalizuar për përfshirje në aktivitete kriminale, kryesisht vepra penale të marrjes së pronës në mënyrë të paligjshme. Sipas kontratës për shitjen e kapitalit të datës 20.10.2015 rezulton se ortak i ri i shoqërisë Stargold Albania sh.p.k është bërë shtetasi Italian Domenico Papalia, i cili ka blerë rreth 30 % të kapitalit. Sipas informacionit policor rezulton se ky shtetas italian është pjesë e grupit kriminal Ndragheta Itali.
