Një i vrarë dhe një i plagosur është bilanci i një atentati mafioz në qytetin e Durrësit. Ngjarja e rëndë ka ndodhur mbrëmjen e djeshme në lagjen 13 të qytetit. Viktima dhe personi i plagosur ndodheshin në makinën tip “Audi A8” me targa AA 857, kur janë qëlluar me armë nga persona te paidentifikuar. Viktima mbetën Edison Harizaj 39 vjeç dhe Genci Caca 33 vjeç, të dy nga Vlora.
Harizaj është pjesë e grupit të Emiljano Shullazit. Fillimisht Genci Caca pësoi vdekje klinike, ndërsa humbi jetën pasditen e djeshme.
Ende nuk ka informacion se kush mund të ketë kryer atentatin, por në zonën e Shën Vlashit është gjetur një automjet i djegur, që dyshohet se i përket autorëve. Ndërsa policia ka ngritur pika kontrolli për kapjen e tyre.
Atentati mendohet se është kryer nga më shumë se një person dhe ka qenë i mirëorganizuar, pasi autorët kanë ndjekur të gjitha lëvizjet e dy personave. Po ashtu autorët kanë qëlluar me më shumë se një karikatore kallashnikovi në drejtim të dy personave.
Ndërkohë policia në një njoftim paraprak tha se: “Më datë 06.11.2018 , rreth orës 22:50 ,në lagjen nr. 13, Durrës brenda një mjeti tip “Audi” është gjetur pa shenja jete shtetasi E.H. 39 vjeç, banues në Vlorë dhe i plagosur shtetasi G.C. 33 vjeç, banues në Vlorë, i cili ndodhet në Spitalin Rajonal Durrës nën kujdesin e mjekëve. Grupi hetimor vijon punën për identifikimin dhe kapjen e autorëve si dhe sqarimin e rrethanave të ngjarjes”.
