Ndërlikimi i situatës në renditje, pas ndeshjeve të javës së fundit, ka bërë që te Vllaznia “t’i rikthehen punës”. Themi kështu, sepse pjesëtarët e saj menduan që me fitoren ndaj Tërbunit, përfundimisht u sigurua qëndrimi në Superligë, por fitoret e Bylisit dhe Flamurtarit kanë bërë që gjithçka të jetë e hapur. Për këtë arsye, sot ka nisur puna me shumë seriozitet, për t’u bërë gati për ndeshjen e radhës me Tiranën, që do të luhet ditën e shtunë në “Selman Stërmasi”. Trajneri Cungu duke ndarë gëzimin e një fitoreje me të tijtë Këto përgatitje kanë nisur sot, me seancën e parë, e cila është zhvilluar paradreke dhe që ka patur një të veçantë: Ajo është ndjekur nga trajnerët, që janë në kurs për paisjen me liçensën UEFA PRO.
Drejtuesit e sektorit përkatës pranë FSHF-së kanë zgjedhur pikërisht Armando Cungun, si një nga dy trajnerët, nga të cilët, ata që duan të liçensohen, kanë se çfarë të mësojnë. Stërvitja e zhvilluar në fakt nuk është zhvilluar e plotë. Ka patur edhe mungesa, teksa ka rënë në sy ajo e Shtubinës së dëmtuar. Armando Cungu gjatë një stërvitje me Vllazninë Siç dihet, kapiteni u largua i dëmtuar nga fusha në ndeshjen ndaj pukjanëve dhe për këtë arsye ende nuk dihet nëse do të jetë në gjendje për të luajtur apo jo këtë fundjavë. Përveç tij ka edhe ndonjë futbollist tjetër me probleme të vogla, por, pavarësisht këtyre gjërave, objektivi i Vllaznisë ndaj bardhebluve është i qartë: marrja e pikëve. Kjo, ngaqë shkodranët nuk kanë dëshirë t’ia lënë fatet e Superligës javës së fundit të kampionatit.
