Detaje të reja zbulohen pas arrestimit të autorit të dyshuar të vrasjes së 32-vjecarit Emiljano Boçi si dhe plagosjes së shokut të tij Melvin Disha në Tiranë në 16 janar 207. Mësohet se autori i dyshuar Tori (Hektor) Xhecuka, 30 vjeç ka qenë për më shume se 6 muaj në hetim.
Gjate kësaj kohe, ai ka jetuar në një banesë me qira në zonën e ‘21 dhjetorit’. Gjatë këtyre muajve mësohet se ai ka dalë ilegalisht nga Shqipëria ne Kosovë dhe në Greqi.
30-vejcari u arrestua në pikën e kalimit kufitar në Kakavijë tek kufiri i gjelbër, ndërsa nuk kishte asnjë send të paligjshëm. Policia i sekuestroi 2 telefona të cilëve po u kryhet ekspertiza.
I arrestuari nuk ka pranuar akuzën para policisë dhe ka thënë se: ‘nuk kam lidhje me ngjarjen’. Ai ka kërkuar avokat dhe nuk ka pranuar të pyetet me tepër. Policia dyshon se i riu është vrasës me pagesë dhe po heton për disa ngjarje kriminale.
Njoftimi i policisë për arrestimin:
Policia e Tiranës në bashkëpunim me Prokurorinë e Rrethit Gjyqësor Tiranë identifikojnë autorin e dyshuar të ngjarjes se ndodhur më 14 Janar 2018 ku mbeti i vrarë Emiljano Boçi.
Identifikimi i autorit të dyshuar pas një hetimi disa mujor me metoda speciale të hetimit nga Seksioni për Krimet e Rënda në Drejtorinë Vendore të Policisë Tiranë në bashkëpunim me Prokurorinë e Rrethit Gjyqësor Tiranë.
Kapet dhe vihet në pranga Tori (Hektor) Xhecuka, 30 vjeç, lindur në Burrel dhe banues në Tiranë, për veprën penale të “Vrasjes me paramendim” e kryer në bashkëpunim dhe të “ Prodhimit dhe mbajtjes së armëve luftarake”.
30-vjeçari është autor i dyshuar i ngjarjes së ndodhur në datën 14 Janar 2018 në rrugën “Shefqet Musaraj”, ku mbeti i vrarë shtetasi Emiljano Boçi, si dhe autor i dyshuar i “Vrasjes së mbetur në Tentativë” të shtetasit Melvin Disha.
Për arsye hetimi në funksion të zbardhjes së plotë të kësaj ngjarje, nuk bëhen me dije detaje të tjera.
