Lufta e ftohtë mes kryeministrit Edi Rama dhe tashmë ish-ministrit të Brendshëm, Fatmir Xhafaj, ka vazhduar edhe sot në seancën e jashtëzakonshme në parlament.
Rama në fjalimin e tij ka bërë elozhe pa doganë për këshilltarin e tij, Sandër Lleshi, të cilin e ka projektuar si ministër të Brendshëm, por ka shqiptuar vetëm një fjalë të ftohtë për Famir Xhafajn: E falënderoj…
Ashtu siç pritej, ky i fundit ka ngritur kartonin në favor të dekretit të presidentit Meta për shkarkimin e tij.
Në këtë seancë Xhafaj ka zgjedhur që të qëndrojë në fund të sallës dhe pasi u është bashkuar 74 deputetëve të tjerë në shkarkimin e vetvetes është larguar i zymtë dhe me shpejtësi, nga ambientet e Kuvendit.
Më herët gjatë fjalës së mbajtur, Rama njoftoi se menjëherë pas shkarkimit të Xhafajt, do të mblidhet qeveria për të emëruar sipas tij ministrin e ardhshëm të Brendshëm, Sander Lleshin, i cili do të funksionojë tani për tani si zv/ministër i parë, duke theksuar se po i jep edhe disa ditë kohë presidentit, që të krijoje bindjen e plotë për këtë figurë.
