Nga Boldnews.al
Në një nga shumë takimet e tij në vend, kryeministri Edi Rama në përpjekje për të bërë batutë që ngjit, tha një të vërtetë që ka mbushur çdo zyrë të shtetit. Kur fshatari nga Shishtaveci i Kukësit ankohej se nuk kishte përfituar dëmshpërblimin për lopën e sëmurë, kryeministria ia ktheu me babtutë. “Nuk kemi çfarë të bëjmë. Ti me lopë, unë me derra…vështirë e kemi punën! Kushdo qoftë ai, pastë faqen e zezë. Po ia them këtu se ndoshta po na ndjek, ose është atje te protesta. Të largohet nga puna, pasi është shkaktar për këtë vonesë skandaloze”.
Fermerit nga malësia e Kukësit edhe mund t’i shkojë lopa në shtëpi, por kryeministri vështirë se do e shkarkojë atë “derr drejtor”, që e ka vendosur vetë në atë post. Pylli “Rilindjes” është i mbushur me derra të tillë që zhvasin qytetarët dhe fondet publike. E janë pikërisht këta “derra drejtorë” që mbajnë në pushtet Ramën.
Njerëz që kanë blerë vota, ushtruar presion mbi votuesit e sot janë shpërblyer me poste të larta. Ata do të marrin pas e madje shumëfish atë para që kanë hedhur për blerjen e votës. Rama këtë e di mirë, ndaj në shumë raste këta “drejtorë derra” kthehen në “derr drejtorësh”, që të japin pushtetin.
Në sy të publikut Rama shpesh i kritikon për të dhënë imazhin se qeveria po punon, e madje sipas tij mjafton tre minuta kohë në telefon për të publikuar hallin në portalin “shqipëriaqëduam” dhe merret zgjidhje e menjëhershme.
Por një të vërtetë këtu do të ketë, se nëse do të shkarkohet një drejtor, diku në çdo cep të vendit, patjetër që kjo do konsiderohet si arritje, e madje do mbahet një konferencë shtypi për të ashtëquajturën “Njësia Anti-korrupsion”, që drejtohet nga ministrja e Drejtësisë Etilda Gjonaj.
Çdo javë ajo zë vend në sallën e takimeve në kryeministri dhe nis të lexojë deri në formë vjershe të mësuar përmendësh raportin javor që zakonisht shoqërohet me disa shifra shkarkimesh, apo edhe masash disiplinore të zyrtarëve publik. Janë diku rreth 200 zyrtarë publik që kanë marrë masa ndëshkimore pikërisht nga e ashtëquajtuara Njësia Anti-Korrupsion, por më shumë se ndëshkim, kjo është një formë për të “lëvizuar elitat”, që të ikë një drejtor e vihet një tjetër që ndryshon vetëm nga emir, por jo nga metoda e punës.
Postin e shohin si instrumentin për tu pasuruar padrejtësisht, për të përlyer duart në afera korruptive pa u shqetësuar, pasi nëse ai është një “derrkuc i vogël” (për nga abuzimi), ka edhe kryederrë që qeverisin në majën e pushtetit, qëllimi i vetëm i të cilëve është që të grabisin një vend të tërë.
Dje ishte dalja e radhës e ministers së Ramës. Gjonaj theksoi se pas denoncimeve apo informacioneve që qytetarët kanë dhënë në platformën e bashkëqeverisjes shqiperiaqeduam.al, janë kryer kontrolle dhe inspektime ku janë rekomanduar 36 masa disiplinore. Raporti javor mbaron me me disa shifra, pak të denocuar dhe thuajse asnjë të dënuar nga zyrtarët e lartë të vendit.
