Edhe pse ka 12 vite që është marrë në dorëzim nga qeveria shqiptare, Aeroporti i Kukësit ende premtohet se do të rikthehet në gjendjen pune nga qeveria Rama.
Edhe sot teksa ishte i pranishëm në Shishtavec Rama tha se nga viti i ardhshëm do të nisë puna për ta kthyer në funksional këtë potencial të rëndësishëm për ekonominë e një prej qyteteve me ekonominë më të dobët në vend.
“Në fillim të vitit të ardhshëm do të nisë ndërtimi i aeroportit, ekzistuesi do të transformohet në një aeroport të standardeve ndërkombëtare për fluturimet me çmime të ulëta dhe studimi që ne kemi bërë me ekspertë të huaj na ka inkurajuar shumë dhe mua më ka entuziazmuar se gjithë analizat e bëra sipas metodave profesionale të parashikimit për suksesin enjë biznesi tregojnë se Kukësi do të lëvizë në një mesatare prej 300 mijë udhëtarësh në vit”- tha Rama.
Sipas tij, kjo sjell rritje të madhe të konsumit dhe investimeve. “Imagjinojeni vetë se cdo të thotë që 300 mijë njerëz që lëvizin përmes Kukësit për të fluturuar jashtë apo për të ardhur nga jashtë këtu. Safeti duke qeshur me tha ‘300 mijë kafe më shumë në Kukës’ për të thënë që aeroporti sjell rritje konsumi, investimesh”– tha Rama.
Pak kohë më parë Fax News publikoi një kronikë ku shihej qartë amortizimi i aeroportit, ku bimësia ka depërtuar gati në pistën e tij, ndërsa kuksianët apelonin për hapjen e tij sa më parë që ai të shërbejë edhe për punësimin e njerëzve.
Po ashtu në fillim të 2018-tës Rama entuziast shkruante: “Lajm i mirë (si për inat të atyre që vunë kujën pse Vlora jo Kukësi): Më në fund një kontakt serioz për aeroportin e Kukësit. Të shohim. Kam besim”, mirëpo ende sot nuk ka asgjë konkrete për të vënë në punë aeroportin.
