Nga Boldnews.al
Doktori në Krimet Mjedisore, Ulsi Manja, ka bërë një gabim trashanik juridik, në një reagim kundër liderit të opozitës, Lulzim Basha, i cili e akuzoi për përfshirje në vepra penale.
Manja, i cili është njëkohësisht edhe Kryetar i Komisionit Parlamentar të Ligjeve, shkruan në një postim në rrjetet sociale se do të padisë Bashën për shpifje për shkak të detyrës: “…Me shumë kënaqësi, së bashku me kolegun do t’i bashkangjitemi Taulantit në rrugen drejt gjyqit me Lulzimin, ku do t’i kërkojmë këtij djali të llastuar dhe qafir, një sasi të hollash për shpifje për shkak të detyrës…!”.
Në të njëjtin reagim, Manja i kujton Bashës se ai ka qenë prokuror. Këtu, Manja i referohet periudhës kur ka qenë si drejtues i Prokurorisë së Shkodrës dhe shef i Arta Markun, e cila, tashmë në detyrën e Kryeprokurores së Përkohshme, do të duhet të mirëpresë kallëzimin e deputetit dhe bashkëpunëtorit të saj të vjetër, kundër Bashës.
Por Manja, në reagimin e tij, ka bërë një gabim të rëndë ligjor. Nëse do të bëhej fjalë për ndonjë deputet tjetër, ky gabim do të ishte i tolerueshëm. Por, kur bëhet fjalë për Ulsi Manjën, lajthitja në objektiv është e pafalshme. Megjithë se karakterizohet nga erudicioni në çështjet e drejtësisë, vlera për të cilat është zgjedhur edhe Kryetar i Komisionit të Ligjeve, Manja ndoshta e ka harruar që vepra penale e “shpifjes për shkak të detyrës” nuk ekziston më në Kodin Penal të Republikës së Shqipërisë.
“Shpifja për shkak të detyrës” ka qenë vepër penale, e parashikuar në nenin 240 të Kodit Penal. Por, ky nen është shfuqizuar, në bazë të ndryshimeve ligjore të vitit vitit 2012. Në atë kohë, Manja ka qenë prokuror i thjeshtë në Dibër, pavarësisht se në biografinë e tij profesionale preferon që t’i kujtohet vetëm koha kur ka qenë drejtues i Prokurorisë së Shkodrës.
Reagimi i doktor Manjës erdhi menjëherë pasi Lulzim Basha, në një deklaratë në dalje të Prokurorisë së Tiranës, ku u pyet lidhur me të dhënat për përfshirjen e Taulant Ballës në aferën e njohur si “Toyta Yaris”, deklaroi:
“…Unë nuk jam i paduruar, se e di që drejtësia mund të vonojë, por nuk do të mungojë. Së bashku me Taulan Ballën, Ulsi Manjën, Jurgis Çyrben, Vangjush Dakon dhe Qazim Sejdinin me shokë, do të vijë dita kur para drejtësisë të jenë edhe veglat që e kanë shëndrruar prokurorinë në aksesor të këtij regjimi kriminal dhe të krimit të organizuar, Arta Marku dhe Donika Prela….”
