“Çdo ndeshje të mëson diçka të re”, shkruan Cristiano Ronaldo në faqen e tij zyrtare në “Instagram”, duke e marrë me sportivitet barazimin 1-1 që Juventusi arriti në shtëpinë e tij ndaj Genoa, në ndeshjen e vlefshme për Serinë A. Sulmuesi portugez realizoi golin e avantazhit provizor për bardhezinjtë, por që s’mjaftoi për të marrë 3 pikët e radhës dhe pas 10 fitoresh radhazi, mes kampionatit dhe Champions, vjen ndalesa e parë e Juves.
CR7 është i qartë që do të jetë e vështirë të fitosh gjithnjë, ndaj e ka mbyllur kapitullin e ndeshjes me Genoa dhe nis të mendojë për sfidën e radhës, atë ndaj Manchester United në Champions League. Një ndeshje e veçantë për Ronaldo, pasi do të luajë ndaj ish-skuadrës së tij një dekadë më parë. “Tani jemi të përqendruar te ndeshja e radhës”, shprehet portugezi, që do të rikthehet në fushën e Champions pas pezullimit që mori në ndeshjen ndaj Valencia.
