Nga Enrik Braho
Shpesh herë akuzojmë duhanpirësit se me lekët që harxhojnë gjatë një viti për blerjen e paketave të cigareve, ato lekë mund ti kursenin dhe në fund të vitit mund të kishin një makinë të re apo të kalonin disa ditë më tepër pushimesh. Por ekzistojnë dhe shumë njerëz të cilët nuk janë duhanpirës, por në fund të vitit lekët e kursyera nga mospirja e duhanit nuk i kanë, ekonomia e tyre është e njëjtë me atë të duhanpirësit.
Të njëjtën gjë mund të themi dhe për dukurinë e vënies së basteve. Bastvënësit mund të kursenin një shumë të madhe parash me lekët që shpenzojnë gjatë një viti duke vënë baste. Gjithsesi ekonomia e një bastvënësi me atë të një jobastvënësi nuk ndryshon shumë, madje shpesh herë e të parit mund të jetë më e mirë sesa e të dytit. Ne që nuk vendosim baste i shpenzojmë lekët në mënyrë tjetër por në fund të vitit lekët e kursyera nga mospirja e duhanit apo mosvënia e basteve nuk i kemi. Dhe pyetja që mund t’i bëjmë vetes është: Me mbylljen e basteve sportive a do jetë populli shqiptar më i pasur ? A do kenë shqiptarët lekë më shumë nga kursimet e mosvënies së basteve ? A do e zgjidhë hallin e varfërisë shqiptare mbyllja e basteve sportive ? Mesa kemi parë tek një individ nuk ndikon shumë, dhe tek një shtet s’besojmë se do ndikojë shumë.
Një pjesë e shqiptarëve duke nisur që nga Edi Rama mendojnë se bastet sportive shtojnë varfërinë dhe rritin papunësinë dhe mbyllja e tyre është zgjidhja. Por GABOHEN. Mbyllja e basteve sportive do ta shtonte akoma më shumë varfërinë dhe do ta rriste akoma dhe më shumë numrin e të papunëve. Në Shqipëri ekzistojnë mbi katër mijë pika bastesh. Në këto katër mijë pika bastesh janë të punësuar mijëra kamarierë, mijëra familje përfitojnë të ardhura me objektet e lëshuara me qira. Dhe në qoftë se do të mbylleshin, këta kamarjerë do të mbeteshin të papunë dhe ato familje që përfitonin prej objekteve nuk do ti kishin më ato të ardhura.
Mbyllja e basteve sportive nuk do ta zhdukte fenomenin e bastvënies. Bastvënia apo bixhozi si fenomen ka ekzistuar shekuj më parë, në mënyra të ndryshme, sot e kemi më të modernizuar, por Edi Rama mendon se historia filloi kur ai erdhi në pushtet. Dhe në qoftë se mbyll bastet sportivë njerëzit do gjejnë një mënyrë tjetër për të vendosur baste. Ujku qimen e ndërron por zakonin se harron. Në qoftë se kryeministri jonë do mbyllë kompanitë shqiptare, shqiptarët do të vendosin baste online në kompanitë e huaja dhe paratë e tyre do të përfundojnë jashtë Shqipërisë.
Në qoftë se do të hedhim një sy në Ballkan, në Greqi, Maqedoni, Kosovë, Malin e Zi, Serbi, etj. por edhe në vendet më të zhvilluara të Europës, në Gjermani, Angli, Suedi, Francë, Itali, etj por edhe përtej kontinentit në Amerikë, në Azi, bastet sportive nuk janë të ndaluara. Atëhere përse duhet ti mbyllim ne? Bastet sportivë janë një lojë e lirë me të cilën mund të luajë kushdo.
Zgjidhja e duhur mund të ishte vendosja e rregullave dhe rritja e kontrollit që baste mos luanin personat nën moshën 18-vjeç, pika bastesh mos kishte pranë institucioneve arsimore apo pranë konvikteve. Mbyllja e tyre është zgjidhja më e kollajshme dhe do të ishte një dështim për kryeministrin tonë si një person që nuk di të vendosë rregull.
