UEFA ka konfirmuar zhvillimet nga ndeshjet më të fundit në Nations League, në një përllogaritje të pikëve dhe situatës të të gjitha përfaqësueseve në Liga dhe Grupet përkatëse janë përcaktuar edhe shanset e tyre për t’u ngjitur më lart apo për të rënë.
Shqipëria anon më shumë në anën e ekipeve që kanë gjasë të bien një Ligë më poshtë. Aktualisht Shqipëria renditet në vend të fundit të Grupit 1 të Ligës C, me 3 pikë po aq sa Skocia, por këta të fundit kanë një ndeshje më shumë për të zhvilluar dhe kemi një përballje direkte që do të përcaktojë edhe fatin e kuqzinjëve.
Në ndeshjen e programuar më 17 nëntor që do të zhvillohet në Shkodër, Shqipëria duhet të fitojë kundër Skocisë që të mbajë gjallë shpresat që të largohen nga vendi i fundit i grupit, që kryesohet nga Izraeli me 6 pikë. Përndryshe Shqipëria zbret një ligë në poshtë, përkatësisht në Ligën C, raporton SportPlus.
“Do të bjerë nëse dështojnë të mundin Skocinë”, thuhet në njoftimin e UEFA-s për ekipet pjesëmarrëse në Nations League.
Ndërkohë situatë krejt ndryshe paraqitet për Kosovë, të cilët kryesojnë në Grupin 3, të Ligës D me 8 pikë, ndërsa ndiqen nga Azerbajxhani me 2 pikë më pak dhe Ishujt Faroe me 4 pikë, ndërsa në fund qëndron Malta me 2 pikë. Kanë mbetur edhe 2 ndeshje për t’u zhvilluar në këtë grup, por “Dardanët” kanë mundësi të shpallen kampionë në këtë grup nëse arrijnë të fitojnë ndaj Maltës në ndeshjen e ardhshme dhe Azerbajxhani të mos fitojë ndaj Ishujve Faroe.
Përndryshe gjithçka do të vendoset në përballjen e fundit mes Kosovës dhe Azerbajxhanit në Prishtinë.
“Kosova ngjitet nëse fitojnë ndaj Maltës dhe Azerbajxhani nuk mundën Ishujt Faroe”,shkruan UEFA në njoftimin e tyre.
