Autoriteti i Komunikimeve Elektronike dhe Postare (AKEP) publikoi ditën e djeshme një njoftim ku ishin listuar disa portale ‘online’, të cilave u ishte lënë 72 orë kohë për të publikuar niptin në faqen e tyre ose të regjistrohen në Qendrën Kombëtare të Biznesit (QKB), përndryshe rrezikojnë të mbyllen.
Në listën e AKEP ishin renditur disa portale me ndikim në vend, ndërsa shumë prej tyre reaguan duke hedhur poshtë pretendimin e AKEP se nuk janë regjistruara në QKB.
Deputeti i Partisë Socialiste, Fidel Ylli e ka cilësuar jo të drejtë këtë renditje nga ana e një institucioni shtetëror.
I ftuar në emisionin e mëngjesit në In Tv, deputeti e pranon që AKEP gaboi në renditjen e portaleve që rrezikojnë të mbyllen.
“Në fakt, mendoj se lista ishte e pasaktë, por pavarësisht gabimit të institucionit që i publikoi mendoj se kjo situatë duhet të rregullohet. Media është pushteti i katërt dhe të nesërmen të rrëzon. Nuk mund të hapësh një portal ti dhe të sajosh çfarë të duash”, u shpreh deputeti socialist.
