Mbrojtësi Ardian Ismajli ka refuzuar ftesën për të përfaqësuar kombëtaren A të Kosovës edhe pse është pjesë e ekipit të moshave. Trajneri Bernard Challandes e grumbulloi në vigjilje të ndeshjes me Ishujt Faroe, që do të luhet sot, por 22-vjeçari nuk pranoi të bashkohej me ekipin e parë.
Gazeta kosovare “Olle” shkruan se lojtari është i pakënaqur nga trajneri zviceran, i cili nuk e llogariti për ndeshjet e shtatorit. Mbrojtësi i Hajdukut të Splitit, në mars ishte afër Kombëtares së Shqipërisë, por ishte presidenti i ndjerë, Fadil Vokrri, që e bindi të vazhdojë me Kosovën. Ai debutoi në miqësore kundër Shqipërisë, pas një paraqitje shumë të mirë. Ardiani nuk ka luajtur asnjë minutë në ndeshjen zyrtare me Kosovën A, gjë që tregon se ai mund të ndjekë rrugën e Kastriot Dermakut, i cili la Kosovë për Kombëtaren A të Shqipërisë.
Afrimi i tij te shqipëria do të ishte një përforcim me vlera për kuqezinjtë, që kanë shfaqur probleme në mbrojtje kohët e fundit. Edhe pse Challandes me stafin teknik kanë zhvilluar mbrëmë bisedime intensive me kapitenin e Kosovës U-21 dhe përfaqësuesit e tij, Ismajli nuk ka pranuar të bëhet pjesë e kombëtares A.
