Nga Boldnews.al
Deputeti Oerd Bylykbashi është i pari zyrtar i lartë të Partisë Demokratike që e konsideron prokurorin e Krimeve të Rënda, Gentian Osmani, si përfaqëues të interesave të Partisë Socialiste. Qëndrimin e tij, Bylykbashi e mbështet në dy vendimmarrje të fundit të prokurorit, “shpëtimin” nga hetimi të Agron (Geron) Xhafaj dhe firmosjen e vendimit të pushimit për disa anëtarë të “bandën e Elbasanit”, të njohur si lidhje e ngushtë me kryebashkiakun socialist të këtij qyteti, Qazim Sejdini.
Në një status në rrjetin social “Facebook”, deputeti Bylykbashi thotë: “Prokuroria e Krimeve të Rënda paska thënë sot se nuk ka kompetencë e hetojë krimin e rëndë të një prej bandave më të rrezikshme të Elbasanit, e cila në shtator të vitit 2017, pothuaj vrau punonjës policie, në një ngjarje të ndodhur në hyrje të Tregut Ushqimor të Elbasanit. Policia e fshehu atë ngjarje derisa u denoncua publikisht nga Kryetari i PD Lulzim Basha. Prokurori Gentian Osmani, me anë të një shkrese zyrtare të drejtuar Gjykatës së Shkallës së Parë për Krimet e Rënda, ka njoftuar se nuk ka kompetencë për të hetuar këtë bandë”.
Bylykbashi i referohet një dokumenti, të publikuar në mënyrë ekskluzive nga “Boldnews.al”, ku prokurori Osmani njofton Gjykatën për Krime të Rënda se Prokuroria ka vendosur që shtetasit Suel Cela, Enea Bekteshi dhe Klemend Xhaferri, të cilët janë të arrestuar për vrasje të punonjësit të policisë, në tentativë, të mos hetohen më për këtë vepër penale.
Këta 3 shtetas konsiderohen si miqtë e ngushtë dhe pjesë e bandës së drejtuar nga Sokol Sanxhaktari, dhëndri i Qazim Sejdinit. Këta 3 persona, në shtator të vitit 2017 u përplasën me Policinë në hyrjen e tregut ushqimor në Elbasan dhe u arrestuan në kohë të ndryshme, për veprën e rëndë penale. Por, pas rreth një viti, një dokument me firmën e prokurorit Osmani, bëri të ditur faktin se Prokuroria për Krime të Rënda mendon se ata duhet të hetohen për një vepër shumë herë më të lehtë penale, “kundërshtim i punonjësve të policisë”, me një marzh dënimi 10 herë më të ulët se sa vepra për të cilën po hetoheshin te Krimet e Rënda.
Deputeti Bylykbashi, duke iu referuar sërish vendimmarrjes së prokurorit Gentian Osmani, vijon statusin e tij në rrjetin social: “Nga ana tjetër, Prokuroria e Krimeve të Rënda është e gjitha e angazhuar për të shpëtuar të dënuarin për trafik droge Agron “Geron” Xhafa dhe trafikantë e kriminelë të lidhur me qeverisjen e Edi Ramës, përmes hetimit të “provave” për kallëzim të rremë të fabrikuara në zyrën e Fatmir Xhafës” shprehet Bylykbashi, i cili vijon:
“I njëjti prokuror që shpall sot moskompetencë për hetimin e krimeve të rënda të bandave të Elbasanit, keqpërdor Prokurorinë e Krimeve të Rënda për të hetuar, tërësisht jashtë kompetencës së Krimeve të Rënda, kallëzimin që ka bërë narkotrafikanti Agron Xhafaj për “kallëzim të rremë” që nuk është krim i rëndë. Ky është produkti i reformës Rama-Xhafaj, një prokurori që vepron me telekomandën e pushtetit” përfundon Bylykbashi.
