Eljon Hato, i plagosur rëndë në përplasjen e armatosur të së enjtes në Tiranë, është një emër shumë i njohur për policinë dhe drejtësinë. Fillimisht ai u publikua me emrin Leart Hasa pak pas ngjarjes, pasi këtë identitet e përdorte për t’iu shmangur policisë, ashtu sikurse edhe disa identetete të tjera të rreme.
28-vjeçari është protagonist i disa ngjarjeve kriminale, ku është përmendur emri i tij në vitet e fundit. Fillimisht u akuzua për vrasjen e një shtetasi në vitin 2014, për të cilën u kap. Gjatë kohës që ishte në burg dhe priste vendimin e gjykatës, ai u akuzua se kishte porositur vrasjen e doktorit A.Terolli në Shkodër.
Por ndërkohë pas më shumë se një viti në burg, ku akuzohej për vrasjen e vitit 2014, ai u lirua me vendim të Gjykatës së Shkallës së Parë të Shkodrës duke u shpallur i pafajshëm. Ky vendim u apelua nga Gjykata e Apelit të Shkodrës, por që nga viti 2015 e deri tani nuk kemi pasur një vendim të formës së prerë, çka ka ndikuar në qenien e tij i lirë.
Por nëse në këtë rast kemi të bëjmë me zvarritje të procesit gjyqësor që ndodh rëndom në sistemin problematik gjyqësor shqiptar, ajo që nuk dihet dhe mbetet ende për t’u verifikuar është historia e çështjes tjeter, ajo për të cilën Eljon Hato akuzohet për porositjen e vrasjes së mjekut radiolog A.Terolli, e cila mbeti në tentative pasi Policia e Shkodrës ndërhyri pak para se ekzekutori Osman Mulja të kryente detyrën sipas porosisë së Hatos.
Publikohen edhe disa foto të Eljon Hatos, disa nga të cilat mendohet se janë siguruar gjatë kohës që ai ishte në burg në Shën Koll para se të shpallej i pafajshëm nga Shkalla e Parë në Shkodër për vrasjen në vitin 2014 të shtetasit Indrit Hylli dhe plagosjen e Jetmir Mollës në një lokal në fshatin Zus.
