Zbardhen detaje të reja nga përplasja e mbrëmshme me armë zjarri mes bandave rivale në zonën e ish-bllokut ku një person mbeti i vdekur, ndërsa tre të tjerë u plagosën. Kamerat e sigurisë zbardhin dinamikën si si konflikti mes bandave rivale ku u vra Rigers Gaxha dhe u plagos Ervis Martinaj, Laert Hasa dhe një personi i tretë i paidentifikuar, në ambientet e një lokali në zonën e ish-bllokut në kryeqytet.
Mesohet se në pamje është fiksuar momenti kur dy grupet rivale futen në lokal dhe brenda pak sekondave aty nis përleshja fillimisht fizike dhe më pas edhe me armë zjarri. I pari që hap zjarr është truproja i Ervis Martinajt, Rigers Gaxha, i cili mbeti viktimë e kësaj ngjarje.
Burime bëjnë të ditur se dy grupet janë konfliktuar me grushte me njëri-tjetrin dhe në sherr e sipër Rigers Gaxha, duke i dalë në mbrojtje Ervis Martinajt, qëllon me armë zjarri në drejtim të grupit rival. Kundërpërgjigja rezulton fatale për Gaxhën i cili merr një plumb në kokë, ndërsa Ervis Martinaj dhe Laert Hasa, të cilët kanë qenë në një tavolinë sëbashku mbesin të plagosur.
Mesohet gjithashtu se nga përplasja e mbrëmshme me armë ka mbetur i plagosur edhe një person i tretë, identiteti i të cilit nuk dihet, ndërsa ndodhet në një spital privat në kryeqytet. Nuk është e qartë ende nëse i plagosuri i përket ndonjë prej bandave rivale. Dy të plagosurit e tjetër Ervis Martinaj dhe Laert Hasa prej mbrëmjes së djeshme ndodhen te Spitali i Traumës jashtë rrezikut për jetën edhe pse ne gjenje te rende. Spitali i Traumës mbahet i blinduar nga FNSH dhe Forcat RENEA për të shmangur një përplasje të mëtejshme mes grupeve. Përplasja me armë zjarri ndodhi në ambientet e lokalit të biznesmenit Redi Popescu i cili ka mbetur i lënduar nga përleshja mes banda kriminale.
Dy armë zjarri tip pistoletë janë përdorur në përplasjen mes bandave, njëra prej të clave është konstatuar në vendin e ngjarjes, ndërsa arma tjetër nuk është gjetur ende. Në lokal ka pasur rreth 10 të shtëna mes grupeve rivale.
Për zbardhjen e rrethanave të ngjarjes, policia ka shoqëruar rreth 30 persona për t’i marrë në pyetje. Përplasja mes bandave alarmoi kryeqytetin pasi ndodhi në një prej zonave më të frekuentura të kryeqytetit dhe në një orar fluksi lëvizjesh.
