Të gjithë ata që kanë aplikuar për bileta me qëllim ndjekjen e Kombëtares Kuqezi nën deshjet e saj në Kampionatin Europian “Francë 2016”, por kërkesa e tyre u refuzua, apo dhe të gjithë ata që e kanë patur gjithmonë në mëndje të bëjnë këtë gjë, por janë kujtuar pas tejkalimit të afateve, tashmë kanë një shans të fundit për të bërë ëndrrën realitet. Njoftimi mbërrin nga portali zyrtari i UEFA-s. Ndeshja Shqipëri-Rumani, e fundit për kuqezinjtë në Grupin A, do të luhet më 19 qershor.
Sipas njoftimit të UEFA-s, është publikuar një listë me 8 ndeshje, për të cilat bëhet me dije se ka ende bileta në dispozicion. Mes këtyre tetë ndeshjeve, është edhe një ndeshje e Shqipërisë. Bëhet fjalë pikërisht për takimin e fundit të Grupit A, mes Rumanisë dhe Shqipërisë, që do të zhvillohet më datë 19 qershor, në orën 21:00, në Lyon të Francës. Ajo që e bën më të vëçantë këtë njoftim, është fakti që mes tetë ndeshjeve të publikuara, kjo mes Rumanisë dhe Shqipërisë, është e vetmja që ka të pashitura bileta me shumicë në të gjithë sektorët e stadiumit.
