Konferenca për shtyp e Angela Merkel dhe Rexhep Taip Erdogan u ndërpre nga një gazetar që mbante veshur një bluzë mbi të cilën shkruhej në turqisht: ”liri për gazetarët”.
Gazetari u largua nga forcat e sigurisë, ndërkohë që dy liderët shikonin njëri tjetrin dhe dukeshin të tensionuar. Më vonë u zbulua se gazetari quhej Adil Yigit, një gazetar turk që drejton portalin e lajmeve online Avrupa Postasi nga Hamburgu.
CNN shkruan se Yigit ishte ulur në një nga rreshtat e parë me një aparat fotografik, dhe mbante veshur bluzën me mbishkrimet: “liri për gazetarët” dhe “liri e shtypit për gazetarët në Turqi”.
Përmes kësaj Yigit synonte të shprehte protestën e tij për shkak se dhjetëra gazetarë, përfshirë gazetarët e huaj, janë burgosur pa gjyq në Turqi. Ata akuzohen për terror që nga përpjekja e dështuar e grushtit të shtetit në 2016.
Një video po qarkullon nga momenti i këtij incidenti në protestë, e publikuar nga Juergen Kloeckner, korrespondent i parlamentit për Huffington Post në Gjermani.
Yigit mund të dëgjohet duke thënë në gjermanisht: “Unë nuk kam bërë asgjë, çfarë është e gabuar?”
