Gjykata Penale e Milanos në Itali dënoi me gjashtë vite e katër muaj burg ish-pastorin e Rozzanos, i cili u gjet fajtor për abuzim seksual me një të mitur.
Ngjarja për të cilën ai u dënua ka ndodhur në vitin 2011, kur viktima, aso kohe ishte një djalë 15-vjeçar. Prokurori kërkoi 10 vite e tetë muaj burg, por gjykata zbuti dënimin. Po ashtu, ai është ndaluar të ketë kontakte me fëmijët në të ardhmen si dhe të jetë punonjës publik.
Prifti Mauro Galli nuk i pranoi akuzat. Ai tha se “kishte fjetur në një krevat më minorenin, por se nuk e kishte prekur fare”.
Pavarësisht kësaj, ai ka dëmshpërblyer me 100 mijë euro familjen e djalit shkruan noa.al. “Vuajtjet e fëmijës dhe anëtarëve të familjes nuk mund të shlyhen me paratë”, deklaroi prokurori në mbyllje të shqyrtimit gjyqësor.
Kleri është prekur shpesh herë nga skandale kohët e fundit. Kisha katolike ka qenë në qendër të kritikave pasi shumë priftërinj janë zbuluar se kanë abuzuar seksualisht.
