Gjashtë punonjës të policisë kufitare në Gjirokastër kanë përfunduar në prangat e kolegëve të tyre të Shërbimit të Kontrollit të Brendshëm, ndërsa është arrestuar edhe një person i 7-të.
Ata akuzohen për shpërdorim detyre dhe dhënie ndihme për kalim të paligjshëm të kufirit.
Në pranga përfunduan:
• Gentian Gjolleshi, punonjës i Policisë Kufitare Gjirokastër;
• Luan Shosha, punonjës i Policisë Kufitare Gjirokastër;
• Roland Gega, punonjës i Policisë Kufitare Gjirokastër;
• Afrim Çomo, punonjës i Policisë Kufitare Gjirokastër;
• Edmond Nikolla, punonjës i Policisë Kufitare Gjirokastër;
• Fatmir Beqo, punonjës i Policisë Kufitare Gjirokastër;
• Besnik Sinani, nga Fieri.
Në orët e pasdites, u arrestua edhe polici i 6-të i shpallur në kërkim, shtetasi Kastriot Senka, nga Fieri.
“Pas një hetimi disa mujor pro-aktiv me metoda speciale të hetimit, SHÇBA ka goditur veprimtarinë e paligjshme të ushtruar nga 6 punonjës policie dhe disa shtetas, në vijën e kalimit kufitar mes Shqipërisë dhe Greqisë, në zonën e Kakavijës“, sqaron Policia e Shtetit.
Policia e Shtetit bën me dije se duke shpërdoruar detyrën, këta punonjës policie në kohë të ndryshme kanë lehtësuar kalimin e paligjshëm nëpërmjet vijës së gjelbër, kundrejt shpërblimit, për shtetas të ndryshëm që kanë patur probleme me lëvizjen në zonën ‘Shengen’.
“Për disa muaj me radhë, efektivë të SHÇBA kanë mbajtur nën vëzhgim, përgjuar dhe kryer veprime simuluese, për të dokumentuar veprimtarinë e paligjshme të këtyre shtetasve“, thuhet në deklaratë.
