Nga Boldnews.al
Ministria e Brendshme, e ndjerë ngushtë nga kriminaliteti në vend, veçanërisht nga vrasjet në seri të tipit mafioz të ndodhura në qytetin e Shkodrës, u mundua që të lërë shenjën, me pretendimin se po punon.Gjashtë të ekzekutuar në vetëm tre muaj dhe dy të tjerë të zhdukur në Shkodër dyshohet se është bilanci tragjik që po sjellin grupet kriminale që veprojnë në këtë qytet, ku disa herë sulmojnë grupet rivale, e herë të tjera eleminojnë biznesmenë që nuk paguajnë gjobat e vendosura prej tyre.
Drejt qytetit verior mëngjesin e sotëm u dërguan Forcat Speciale të Ndërhyrjes së Shpejtë dhe efektivat Elitë të RENEA-s. Përfundimi i operacionit “blic” ishte bllokimi i 5 makinave që u përkasin familjeve Lici dhe Bajraj. Dy fise të njohura në Shkodër që përfliten për lidhje politike, e që dyshohen për trafiqe, vrasje e gjobëvënie, nuk janë prekur dhe asnjë prej tyre nuk ka përfunduar në pranga.
“Në këto muaj është bërë një skanim i qartë dhe i hollë i grupeve kriminale që nuk u krijuan sot, por kanë vite. Kemi goditur një pjesë të këtyre grupeve dhe jemi në rrugë të mbarë për të goditur dhe grupe të tjera shumë shpejt”-tha Ministri i Brendshëm Fatmir Xhafaj dy ditë më parë në lidhje me ngjarjet e rënda të ndodhura në Shkodër. Dita e “gjykimit” ishte sot në Shkodër, por policia shkoi bosh e u kthye bosh.
I gjitha aksioni u sfumua në bllokimin e pesë automjeteve të blinduara. Por posedimi i një makinë të blinduar nuk është shkelje ligjore, ndaj pas pak ditësh pasi të merren për verifikim këto automjete do tu dorëzohen përsëri pronarëve të tyre. Përfundimisht aksioni i madh u kthye në një fluskë po aq të madhe, që shërbeu vetëm për show mediatik dhe një “paradë” policore të kotë, për të dhënë imashin se strukturat e rendit po funksionojnë.
Gjithashtu në këtë aksion pa “bereqet” ka edhe shkelje proceduriale. Forcat Speciale lëvizin dhe aktivizohen vetëm me urdhër të Drejtorit të Përgjithshëm të Policisë së Shtetit, por më parë duhet të ketë të dhëna të sakta për veprimtari kriminale dhe më pas përfshihen Forcat Speciale për ndalimin e autorëve, apo sekuestrimin e objekteve të paligjshme.
Fakti që nuk është kapur qoftë edhe një armë, apo arrestuar ndonjë të dyshuar qoftë edhe nga anëtarët e këtyre dy fiseve, tregoi se nuk ka pasur arsye për të aktivizuar Forcat Speciale. Kwtw her shfaqja e dobët nuk vlejti as për propagandë qeveritare.
