Interi e ka regjistruar fitoren e parë sezonale në Serie A duke mposhtur Bolognan me rezultat 3-0 në udhëtim.
Gjysma e parë e takimit nuk prodhoi gola, edhe pse rastet nuk munguan. Filip Helander e pati shansin e parë të mirë për vendasit, mirëpo intervenoi Samir Handanovic.
Në fund të pjesës së parë, Radja Nainggolan pati një rast të mirë, por goditja e tij shkoi pranë portës.
Keita Balde pati një mundësi të mirë shënimi në fraksionin e dytë pas një pasimi nga Roberto Gagliardini.
Rezultati u zhbllokua në minutën e 67-të, kur Radja Nainggolan shënoi golin e parë me fanellën e Interit në debutimin e tij si startues. Asistues ishte Matteo Politano.
Pak minuta pas inkuadrimit në lojë, Antonio Candreva e shënoi golin e sigurisë (82′) pas asistimit nga Ivan Perisic.
Ishte pikërisht anësori kroat, Ivan Perisic, lojtari që e realizoi golin e tretë të Nerazzurrëve (85′).
(Foto: Getty Images)
Kjo ishte fitorja e parë e Interit në sezonin 2018/2019 në Serie A, pas një humbjeje dhe një barazimi, dhe numëron katër pikë.
Në tri ndeshjet e para, Bologna ka menaxhuar të arrijë vetëm një barazim dhe numëron vetëm një pikë në këtë fillimsezoni.
Në xhiron e radhës, Interi e pret Parman në Giuseppe Meazza, ndërsa Bologna udhëton te Genoa.
