Këshillatërt e Partisë Demokratike u kanë bërë thirrje të gjithë qytetarëve të Elbasanit të mos paguajnë energjinë elektrike nëse kanë mbifaturime.
Kjo vjen pas shqetësimeve të shumta të ardhura në adresë të tyre nga banorët për mbifaturim të energjisë elektrike muajin e fundit.
Blendi Himçi, këshilltar i djathtë tha se është e padrejtë që fatura e energjisë elektrike të kalojë cakun e asaj që lexohet në sahatin e çdo qytetari. Himçi gjithashtu ka kërkuar që drejtues të OSHEE¬së në Elbasan të japin llogari para këtij këshilli.
“Mbifaturimi i energjisë elektrike është një skandal i vërtetë. Buxheti i OSHEE– së nuk mund të mbushet me mbifaturime. Reforma që u propozua nga qeveria në mënyrë pompoze, sot ka rënë në një batak të jashtëzakonshëm, pikërisht në muajt ku energjia është konsumuar më pak, për shkak të kohës së mirë. Në çdo familje është e prekur, dhe kjo prek të majtë dhe të djathtë”, u shpreh Himçi.
“Këtë shqetësim e ngre duke thirrur edhe pjesën e shoqërisë civile, që t’i bashkëngjiten kësaj nisme, për të mos paguar faturën e energjisë elektrike. Nëse u referohemi matësave, nuk është djegur as gjysma e asaj që është në faturë. Dhe nëse nuk paguhet në afatin e caktuar, OSHEE¬ja pret energjinë elektrike. Kjo faturë është dyfishuar për çdo familje për këtë muaj. Ndoshta ky shqetësim nuk i përket Këshillit Bashkiak, por ne përfaqësojmë interesat elbasanase”, tha Himçi. Nga ana e tij kreu i bashkisë, Qazim Sejdini, i njohur me këtë rast ka ftuar qytetarët elbasanas që të mos e paguajnë diferencën e energjisë elektrike, atë çka nuk është në sahatin e tyre, ndërsa ka shtuar se “Unë si kryetar bashkie jam i gatshëm të kontaktoj vetë me drejtues të OSHEE–së, sepse janë xhepat e mbarë qytetarëve elbasanas”. Kjo kërkesë e këshilltarëve të djathtë u bë pasi Këshilli Bashkiak miratoi një sërë pikash në rend të ditës, mes tyre edhe dhënien e ndihmës ekonomike për muajin prill, dhënien e pagesës për invalidët, për personat me aftësi të kufizuara, mbi miratimin e rregullores së brendshme të Agjencisë së Shërbimeve Publike Elbasan etj.
