Kryeredaktor i së përditshmes opozitare në Turqi “Cumhuriyet”, Can Dundar, është gjobitur me 10,000 dollarë për shkak se kishte publikuar një skandal korrupsioni që kishte trondit Qeverinë turke në vitin 2013, e që autoritetet e kanë konsideruar si fyerje ndaj presidentit turk, Recep Tayyip Erdogan.
Avokati i Dundarit, Blent Utku, ka thënë se do ta apelojë këtë vendim, ndërsa arsyeja e saktë e vendimit që ka marrë gjykata në Stamboll nuk është bërë ende publike.
Kryeredaktori i së përditshmes, “Cumhuriyet”, Dundar ka shkruar në llogarinë e tij në Twitter se “nëse zbulimi i së vërtetës është krim, ne do të vazhdojmë ta kryejmë atë”.
Përveç kësaj akuze, Dundar akuzohet se gjoja ka tentuar ta përmbysë qeverinë e Turqisë. Akuza buron nga raportimi i tij për dërgesat e armëve nga Turqia për grupet rebele në Siri, dhe nëse shpallet fajtor, atëherë do të dënohet me burgim të përjetshëm.
Afro 2,000 njerëz janë duke u ndjekur penalisht në Turqi për fyerje të Erdoganit, ndërsa kritikët thonë se Erdogani përdor gjykatat për të heshtur zërat kundërshtarë.
