Nga Boldnews.al
Në këtë periudhë pushimesh verore dhe vape të madhe, deputeti Myslim Murrizi po e kalon kohën duke kërcënuar në rrjete sociale persona, të cilët e kritikojnë për sjelljen e tij aspak të hijshme qytetare, por edhe politike.
Në një diskutim, me fjalor tipik të tij, deputeti i dalë me logon e Partisë Demokratike në Lushnje, kërcënon publikisht një qytetar, A.B., i cili i kërkon politikanit që të vetëpërmbahet kur shprehet publikisht.
Por ligjvënësi Murrizi duket qartë që nuk pranon asnjë kritikë, aq më tepër kur ato i drejtohen publikisht. Në përgjigje të sugjerimit të qytetarit, deputeti përgjigjet: “…Nuk merrem me fundërrina si puna jote, por komentoj MIQT e mij. Ti po ke surrat bujrum e më dil përpara se në Lushnje jam pothuajse çdo ditë. Me zagaret une kam vetëm një mënyrë komunikimi. Person publik jamë për ata që më kanë votuar e mbështetur me votë nga viti 1990 e më kanë zgjedhur 2 herë deputet, jo për pjellë të komunizmit”.
Reagimi i deputetit Murrizi, të cilin “Boldnews.al” e ri-sjell të plotë, përfshirë gabimet gramatikore, është një kërcënim i hapur për qytetarin A.B. Politikani Murrizi, i cili është njëkohësisht edhe biznesmen, edhe deputet, preferon që të zëvendësojë forcën e argumentit thjeshtë në forcë verbale dhe, po sipas fjalëve të tij, edhe fizike.
Debati ndërmjet deputetit dhe qytetarit është zhvilluar në faqen zyrtare të “Boldnews.al”, në vijim të një artikulli me titull “Myslym-llëqet në kohën e Umberto Eco–s“. Në atë shkrim, redaksia vinte në pah pikërisht faktin që deputeti Murrizi karakterizohet nga mungesa e theksuar e komunikimit qytetar dhe publik.
“Boldnews.al”, në funksion të informimit publik, publikoi një profil të shkurtër të deputetit demokrat, i cili është “memec” në sallën e Parlamentit, por shumë aktiv në konflikte fizike e verbale në ambjente publike dhe në rrjete sociale.
Myslim Murrizi u zgjodh deputetë, nën siglën e Partisë Demokratike, në votimet e përgjithshme të vitit 2017. Prezantimi i tij publik i deritanishëm mund të konsiderohet si një prej gabimeve të kryetarit të PD-së, Lulzim Basha, i cili e përfshiu në listën e kandidatëve me potencial të lartë fitoreje, në zonën e Lushnjes.
Pasi u zgjodh deputet, Murrizi nuk ka lënë asnjë gjurmë në jetën parlamentare. Por, nga ana tjetër, ai është shumë aktiv në rrjete sociale, në të cilat përleshet verbalisht me këdo që nuk ndan të njëjtin mendim me atë ose që e kritikon për sjelljen dhe qëndrimet aspak normale për një përfaqësues të popullit.
Madje, ai nuk e ka aspak problem që edhe të kërcënojë qytetarët, pikërisht atyre nga të cilët ai mori votën, si në rastin e qytetarit A.B., të cilin e fton për t’u përballur në Lushnje.
