Hetimet për ish ministrin e Brendshëm Sajmir Tahiri dhe të akuzuarve të tjerë të dosjes nuk kanë gjasa të përfundojnë as në muajin tetor kur është edhe afati i përfundimit të zgjatjes tre mujor të fundit. Prokurorët do të mbidhen në shtator për të vendosur për veprimet që do të kryhen në vijimësi me dosjen ndërkohë që pritet mbërritja e lëtërporosive nga tre shtete si dhe verifikimet e bankave dhe hipotekave për pasuritë.
Zgjatja edhe me tre muaj e afateve të hetimit për dosjen e ish-Ministrit të Brendshëm Sajmir Tahiri duket se nuk do t’i mjaftojë organit të akuzës për të përfunduar dosjen dhe për ta dërguar atë në gjykatë. Burime nga grupi hetimor thanë për Ora News se në shtator grupi i prokurorëve do të mblidhet për të vendosur veprimet që do të kryejnë për të përfunduar hetimet. Nga grupi i hetimit eshtë larguar edhe prokurorja Elisabeta Ymeraj, e cila ka marrë drejtimin e Prokurorisë së Tiranës.
Pengesë për hetimet është bërë edhe mbërritja e letër-porosive të dërguara nga prokuroria shqiptare në disa shtete si Itali, Mali i Zi dhe Greqia.
Me zgjatjen e fundit tre mujore hetimet duhet të përfundonin në 17 tetor por deri në këtë afat mbyllja e dosjes sipas burimeve është e pamundur.
Në muajin qershor prokuroria ka dërguar tre letër-porosi të reja drejt Italisë pas daljes së të tjera detaje nga hetimi. Për ish ministrin e Brendshëm dhe për të akuzuarit e tjerë të dosjes Habilaj, prokuroria ka nisur edhe verifikimin e pasurisë.
Organi i akuzës ka dërguar shkresa bankave të nivelit të dytë dhe zyrave të regjistrimit të pasurive të paluajtshme në të gjithë vendin për të verifikuar pasurinë që është në emër të tij apo edhe të personave të lidhur me të.
Nga burimet mësohet se prokurorët e dosjes kanë dyshime të forta se ish-ministri Tahiri ka shpërdoruar detyrën dhe ka kryer korrupsion në kuadër të grupit të strukturuar kriminal të drejtuar nga Moisi Habilaj.
Në duart e Prokurorëve janë edhe disa foto të verës 2017 ku ish ministri është fokusuar teksa udhëtonte me një jaht nga Mali i Zi në Leçe të Italisë. Ajo që grupi hetimor kërkon të mësojë është se kush është pronari i jahtit dhe në shoqërinë e kujt ka qënë ish ministri në këtë udhëtim.
Ish ministri i Brendshëm po hetohet pa masë sigurie pas vendimit të marrë nga Gjykata e Apelit për Krime të Rënda e cila rrëzoi vendimin e shkallës së parë. Por vendimet për heqjen e masës për ish ministrin e Brendshem janë ankimuar në Gjykaten e Lartë, e cila ende nuk i ka marrë në shqyrtim
