Pavarësisht se jemi ende në sezonin që sapo kanë nisur konkurset ata që do të hyjnë për herë të parë në auditorë, Ministria e Arsimit ka shpallur, edhe datën e fillimit të vitit të ri akademik 2018-2019.
Sipas ‘Panorama; urdhri është firmosur nga ministrja Lindita Nikolla, i cili parashikon që universitetet të startojnë në mesin e muajit tetor.
Në të parashikohet dhe periudha e pushimeve, më pak se dy javë, që do të nisin një ditë përpara Krishtlindjeve e deri më 4 janar. “Viti akademik 2018-2019 në institucionet e arsimit të lartë, të fillojë në datën 15 tetor 2018 dhe të përfundojë në datën 30 shtator 2019.
Periudha 24 dhjetor 2018 deri në 4 janar 2019, të jetë periudhë pushimesh për studentët”, thuhet në urdhrin e ministrisë. Ndërkohë, deri atëherë është menduar në fakultete të ketë përfunduar regjistrimi në tre raundet.
“Institucionet publike të arsimit të lartë, në përfundim të regjistrimit të kandidatëve fitues, të dërgojnë në të gjitha ndërmarrjet ‘Trajtimi i studentëve’ sh.a listën e studentëve të regjistruar, sipas programeve të studimit dhe fakulteteve përkatëse”.
Kandidatët e sivjetmë kanë katër ditë kohë për të aplikuar, ndërsa universitetet do të duhet të përzgjedhin më të mirët deri në datën 29 gusht, kur shpallet lista zyrtare e raundit të parë.
