Gjyqtari i Gjykatës së Lartë Medi Bici u përball me KPK-në në procesin e vettingut dhe duket se raporti i ILDKPKI-së e ka vënë paksa në diskutim konfirmimin në detyrë. Sipas ILDKPKI, Bici ka kryer deklarim të pasaktë të pasurisë së tij, duke e fshehur atë.
KPK ka konstatuar se gjyqtari Medi Bici ka këto prona: Vilë katërkatëshe në rrugën Pasho Hysa ndërtuar 93′-96′, si ndërtim pa leje në një toke 237 m katrorë. Më pas kjo banesë është legalizuar në vitin 2011.
KPK në relacionin e saj shton se ka mospërputhje me vlerat e truallit. Sipas KPK gjyqtari e ka ndërtuar shtëpinë pa leje ndërkohë që ka qenë gjyqtar, duke shkelur ligjin. Por nga ana e tij Bici ka thënë se përsa i përket pasurisë, ai është ndihmuar nga vëllai me një shumë prej 10 mijë eurosh për shkollimin e fëmijëve. Po ashtu KPK shton se gjyqtari ka dhe një llogari rrjedhëse me 1 milionë lekë me burim nga kursimet vetjake.
Por pas deklaratave nga KPK, gjyqtari Medi Bici dërgoi disa prova të reja që u administruan nga komisioni. Bici më tej gjatë seancës deklaroi: Në vitin 1986 kam blerë një shtëpi në Tiranë. Dhe në atë shtëpi pas 90’, duke qenë se po shembej menduam që të ndërtonim një tjetër mbi të vjetrën. Pasi biseduam me pronaret të cilët ende nuk e kishin rimarrë shtëpinë dhe kështu ramë dakord ta ndërtojmë. Sa u përket borxheve nga vëllai, gruaja më mbeti pa punë kisha tre fëmijë dhe vetëm unë punoja. Banesën në Tiranë e kam blerë në një nga zonat më të varfra.
Po të shikoni pasaportat e fëmijëve të mi nuk do gjeni asnjë vule në vendet e BE. Vetëm në Mal të Zi e Kosovë kemi shkuar. Bici më tej në deklarimet e tij para KPK-së ka thënë: Në vitin 1997 jam shpallur gjyqtari i vitit. Kam dhënë 3 dënime të përjetshme. Dy për vrasjen e një kambisti, po ashtu kam dënuar dhe ish-punonjësin e SHISH-it që vrau studenten dhe nënën e tij. Prandaj kërkoj rikonfimimin në detyrë. Trupa e KPK e ka mbyllur seancën dhe pritet që nesër të merret vendimi. Pas seancës gjyqtari Bici në një deklaratë për mediat tha se beson tek KPK.
Pjesë nga deklarata
Prisja vlerësim tjetër duke pasur parasysh karrierën e gjatë.
Çfarë prisni nga komisioni?
Unë besoj.
Si e vlerësoni punën e Gjykatës së Lartë?
Gjykata e Lartë gjykon me 22% të kapacitetit, janë 25 mijë çështje, të tjerat mund t’i nxirrni vetë.
Qytetarët duhet të vazhdojnë të presin për të marrë drejtësi?
Me këtë numër gjyqtarësh vetëm çështjet emergjente mund të bëhen.
