Sir Alex Ferguson ka dalë në publik për herë të parë që kur u shtrua me urgjencë në spital tre muaj më parë pasi pati një hemoragji cerebrale. Trajneri legjendar falenderoi stafin e mjekëve dhe infermierëve që i shpëtuan jetën përmes një videomesazhi që u postua në rrjetet sociale të Manchester United.
Në klipin e shkurtër 76-vjeçari u duk në formë të mirë shëndetësore i ulur në një karrige në ambient të hapur. Pamjet me siguri do të qetësojnë tifozët e tij anembanë botës të cilët menduan më të keqen kur ai u shtrua në spital me urgjencë në muajin maj.
“Së pari dua të falenderoj stafin në spitallin Macclesfield, Salford Royal dhe Alexandra”, tha skocezi. “Më besoni, pa këta njerëz që u kujdesën aq shumë për mua nuk do të isha i ulur këtu sot, kështu që faleminderit shumë nga unë dhe familja ime. Faleminderit gjithashtu të gjithëve për mesazhet mbështetëse që më keni dërguar. Do të rikthehem në stadium më vonë për të ndjekur skuadrën por ndërkohë i uroj gjithë të mirat lojtarëve dhe Jose (Mourinhos). Faleminderit shumë”, ishte mesazhi i Sir Alex.
Video solli reagime të shumta nga bota e futbollit, me klubin e tij të parë si trajner, Aberdeen, por edhe ish-lojtarë si Wayne Rooney apo Gary Neville që ripostuan videon e tij me urimet përkatëse.
Skocezi kishte dalë nga spitali gjashtë javë më parë, por tani është ndjerë plotësisht i gatshëm për të folur në public, ndërsa mjekët që u kujdesën për të kanë pranuar se ishte me shumë fat që arriti të mbijetonte.
Ferguson ka drejtuar Manchester United nga viti 1986 deri në vitin 2013, duke fituar dy herë Champions League, 13 herë kampionatin dhe 5 herë Kupën e Anglisë.
