Transferimi i Malkomit te Roma thjesht do të shtonte më shumë milionat e shpenzuara deri tani në Serinë A, por edhe pse braziliani u zyrtarizua ditën e djeshme te Barcelona, kampionati italian vazhdon të mbajë vendin e dytë. Kjo është një nga merkatot më të çmendura që kanë bërë skuadrat e kampionatit italian, të cilat e kanë kuptuar që vetëm në këtë mënyrë mund të jenë konkurruese. Deri tani skuadrat e Serisë A kanë shpenzuar 815 milionë euro.
Por, vendin e parë e mban si gjithmonë kampionati anglez, pasi në vitet e fundit janë ata dominuesit e shpenzimeve në merkato. Premier Liga ka arritur të shpenzojë deri tani 935 milionë euro. Por, Seria A krenohet me faktin që ka lënë pas 3 kampionate të tjerë shumë të rëndësishëm si La Liga, Bundesliga dhe ai francez. Italia futbollistike pritet që të arrijë shumë shpejt 1 miliard euro shpenzime, duke qenë se kanë mbetur edhe 3 javë të tjera nga përfundimi i merkatos. Vitin e kaluar u arrit kjo shifër, por në këtë merkato nuk kanë shpenzuar ende skuadrat si Milani, që do të bëjnë lëvizje për sulmuesin. Dhjetë lojtarët më të shtrenjtë deri tani i kanë blerë vetëm 4 skuadra, Juventusi 2, Interi 3, Roma 2 dhe Napoli 3. E kuptueshme që kjo lidhet me prezencën në Ligën e Kampioneve për të bërë figurë të mirë.
TOP 10- Dy vendet e para i mban skuadra e Juventusit me transferimet e Kristiano Ronaldos dhe Zhoao Kanselos. Një vend në podium e mban Interi me Naingolanin, transferimi i të cilit në total kapi vlerën e 38 milionë eurove. Pastaj renditen me radhë lojtarët e tjerë të transferuar te Napoli, Roma, etj. Interesant është fakti që deri tani ka pasur shpenzime të shumta edhe nga skuadrat e vogla si Udineze që kanë arritur në kuotën e 40 milionë eurove dhe Torino që ka arritur në 49 milionë euro. Merkato e Serisë A do të mbyllet më 17 gusht në orën 19:00, pasi një ditë më vonë do të fillojë kampionati.
