Edinson Cavani, 31 vjeç, 40 gola në 48 ndeshje sezonin e kaluar me PSG dhe 49 gola në 50 ndeshje në sezonin mëparshëm. Ky është emri që fillon të tingëllojë me forcë në katin e fisnikëve të Bernabeut për të zëvendësuar mungesën e goleadorit që shkoi te Juventus. Sipas informacioneve të AS, porta është tërësisht e hapur për uruguaianin, i cili nga ana tjetër pret një ofertë nga madrilenët. Madridi është një ëndërr e papërmbushur dhe Cavani do të ishte i gatshëm që të nënshkruante për dy apo tre vite në Bernabeu.
Cavani është një nga lojtarët më të dashur nga tifozët e PSG. Dhe gjithashtu nga më të respektuarit nga Nasser Al Khelaifi dhe njerëzit e tij të besuar. Është profesionist dhe ka efektivitet. Për këtë arsye, Cavani nuk është bërë kurrë një pikë konflikti te PSG, kështu që në rast se do të thirret nga Real Madrid, Cavani e ka të gjithë të drejtën që t’i kërkojë Khelaifi-t që të përfitojë nga kjo mundësi.
Largimi i Neymar ose Mbappe nga PSG është i pamundur. Janë pjesë e skuadrës vetëm prej një viti dhe kështu do të qëndrojnë të jenë boshti i projektit. Ndërsa ajo e Cavani-t është çështje e ndryshme. PSG nga ana tjetër mund edhe të përfitojë nga ky rast, sepse do të shmang përfundimisht përplasjet që ka pasur mes Neymar dhe Cavani-t, të cilat nisën nga ekzekutimi i një penalltie.
Cavani ka kontratë të vlefshme deri në vitin 2020. Ai e përtëriti atë sezonin e kaluar. 31-vjeçarin PSG duhet ta lërë të shkojë për një shifër më pak se 100 milionë euro. Ata i paguan Napoli-t 65 milion euro për të, por lojtari i ka shlyer këto para me vitet që ka qëndruar te francezët.
Problemi i vetëm për Madridin do të ishte paga e lartë e lojtarit, i cili paguhet 12 milionë euro neto në sezon plus 2 milion euro në varësit të golave të shënuar. Por edhe kjo do të ishte një pengesë e rikuperueshme për “Los Blancos”, pasi kontratat e reklamave do të rriteshin pas transferimit të Cavani-t dhe përqindja që do të merrte do të kompensonte një pagë pak më të ulët.
