Laçi kërkon surprizën në Norvegji. Kurbinasit duan që të mos pësojnë ndaj Moldes dhe nëse ndodh kështu, atëherë misioni i parë mund të konsiderohet i kalueshëm. Masat prej Besnik Prengës janë marrë që të gjitha. Me seancat e zhvilluara, dje ai ka “vulosur” jo vetëm formacionin, por ka dhënë edhe porositë e fundit. Afrimi i Marko Radasit jep jo vetëm garanci dhe eksperiencë, por sjell edhe ndryshime në prapavijë.
Kroati i huazuar prej Skënderbeut do të luajë në krahë të Hoxhallarit si qendërmbrojtës, ndërsa Gjonaj do të spostohet në rolin e shkatërruesit. Në krahun e djathtë të mbrojtjes kthehet Fangaj, i cili ndeshjen e parë me qipriotët e humbi prej një dëmtimi, ndërsa të dytën e nisi zëvendësues. Tashmë që është rikuperuar, është më shumë se gati për ta nisur nga minuta e parë. Në mesfushë do të sakrifikohet një mes Jonuzit dhe Lushkjes, megjithatë vendimi do të merret sot.
PRENGA – Besnik Prenga beson te kualifikimi. Ai mendon që shanset do të rriteshin nëse do të luanin ndaj qipriotëve të Anorthosis. Në një deklaratë të dhënë për “RTSH Sport”, numri një i pankinës së kurbinasve thekson se skuadra e tij është e dënuar për të dhënë maksimumin. Ai e di shumë mirë që duhet përvojë në kësi takimesh, ndaj ardhmja e Marko Radasit mund t’u bëjë shumë punë. “Laçi duhet të bëjë ndeshjen e jetës që t’ia dalë ndaj Moldes. Nuk kemi rrugë tjetër, veçse të japim maksimumin. Lojtarët duhet të jenë më shumë se të organizuar dhe të ndihmojmë njëri-tjetrin. Nëse do të luajmë si ndaj Anorthosis në ndeshjen e parë dhe të dytë, besoj se do të kemi shumë shanse për kualifikimin.
Eksperienca është e rëndësishme, e sidomos kur luhet me sistem vajtje-ardhje. Por, nuk është as vendimtare. Për mua rëndësi ka grupi. Me këtë qëllim erdha që në ditën e parë, që të ndërtoja një ekip që të përballoj eksperiencën, aftësitë dhe cilësitë e kundërshtarit. Marko Radasin nuk e kemi marrë që të na rrisë nivelin, por që të na mbështesë dhe të na japë atë përvojë, e cila është e domosdoshme në këto dy takime.
