Pavarësisht largimeve të rëndësishme në kontigjent si gjatë merkatos së verës, ashtu edhe në atë të janarit, gjithashtu dhe pas ndryshimeve të shpeshta në krye të pankinës, skuadra e Laçit arriti të përfshihej në këtë fundsezoni në elitën e futbollit shqiptar, duke u kualifikuar për në Kupën e Shqipërisë. Një arritje edhe më e vlefshme kjo e kurbinasve, pasi kanë skualifikuar në gjysmëfinale ekipin kampion të Shqipërisë, Skënderbeun, pavarësisht humbjes së sotme në Korçë me rezultatin 2-1.
“Më duhet ta pranoj se ishte një ndeshje e vështirë, por njëherësh edhe një humbje e “bukur”, pasi u kualifikuam për në finale. U përpoqëm të ruanim avantazhin e takimit të parë dhe e shfrytëzuam atë fakt. Tentuam të shfrytëzonim gjithashtu hapësirat që krijonte kundërshtari, që të gjenim rrjetën. Skënderbeu vinte dhe nga një periudhë jo e mirë dhe besoj se kjo ishte disi në favorin tonë”, komentoi trajneri Ramadan Ndreu. Skënderbeu-Laç 2-1, kurbinasit u kualifikuan në finalen e Kupës së Shqipërisë.
“Kemi mjaftueshëm kohë në dispozicion për tu përgatitur për atë përballje. Është vetëm një ndeshje dhe momentalisht nuk jemi në lartësinë e duhur, pasi kemi patur probleme në sulm, por do të përpiqemi të dalim përpara me Cetkoviç”, deklaroi në përfundim të ndeshjes me Skënderbeun, trajneri i Laçit.
