Transferimi i Cristiano Ronaldos nga Real Madridi te Juventusi do të ketë një efekt rigjallërues mbi futbollin italian, sipas ish-futbollistit të Real Madridit dhe Milanit, brazilianit Kaka.
Bardhezinjtë e bindën Real Madridin të ndante rrugët me golashënuesin e vet më të mirë të të gjitha kohërave, duke rënë dakord për një marrëveshje 100 milionë euro.
Dhe, pesë herë fituesi i “Topit të Artë” përfundoi të hënën testet mjekësore në Torino, si dhe u prezantua para mediave të shumta. Ish-futbollisti ndërkombëtar i Brazilit, Kaka, i cili u transferua nga Sao Paulo te Milani në vitin 2003 dhe më pas kaloi katër vjet në Madrid, para se të kthehej në “San Siro”, beson se prania e Ronaldos në Seria A mund të ndihmojë në rivendosjen e reputacionit sportiv të kampionatit italian, që në vitin 2006 e pa Juventusin të zbresë në Seria B.
“Ronaldo te Juventusi është një gjë e mirë për të gjithë Seria A, –tha Kaka për “Omnisport”, duke folur me mirësjellje ndaj Adidas. –Duke luajtur për Juventusin, është diçka e mrekullueshme. Futbolli italian kishte momente të vështira në të kaluarën, por Juventusi mbijetoi dhe u bë i madh përsëri në Itali dhe në Europë, pas një periudhe negative. Bardhezinjtë e nisën ringritjen nga Seria B dhe tani janë një ekip i madh në Itali dhe Europë. Ata nënshkruan me një nga lojtarët më të rëndësishëm, e morën Ronaldon në Itali”.
Ronaldo do të synojë të ndihmojë Juventusin të fitojë titullin e tetë të njëpasnjëshëm në Seria A, në sezonin 2018-2019, por mbështetësit e klubit shpresojnë se ai mund t’i japë fund pritjes së tyre të gjatë për një trofe të tretë të Ligës së Kampionëve. Juventusi, për herë të fundit e fitoi Champions-in në vitin 1996, por humbi finalen më 2015 me Barcelonën dhe Real Madridin më 2017. “Los Blancos” dhe Ronaldo, gjithashtu, i likujduan bardhezinjtë në çerekfinale të këtij kompeticioni, sezonin e kaluar.
Por Kaka ndjen se efekti i Ronaldos nuk do të jetë vetëm në Torino, por në të gjithë Seria A dhe ligat më të ulëta të Italisë. “Të gjitha ekipet e tjera do të kenë një avantazh, falë këtij emri të madh, – tha 36-vjeçari. – Sipas mendimit tim, si një ish-futbollist i kampionatit italian dhe mbështetës i Milanit, do të jetë një gjë e bukur për futbollin e këtij vendi. Unë preferoj të shoh anën pozitive të nënshkrimit të Ronaldos. Kjo gjë duhet të jetë një shembull për Milanin.
Edhe pse po kalon një periudhë negative, është e mundur që Milani, ashtu si Juventusi, të ringrihet e të bëhet përsëri i madh. Kuqezinjtë duhet të përfitojnë nga ky moment, sepse vëmendja është në futbollin italian. Cristiano Ronaldo sjell shumë gjëra të mira në futbollin italian; mediat, sponsorët dhe mbështetësit, të cilët dëshirojnë ta shohin atë dhe ekipet italiane. Për futbollin italian, është momenti për të përfituar nga ky lojtar”.
