Detaje të reja dalin në dritë për kërcënimin që i është bërë Rektorit të Universitetit të Tiranës Dhori Kule nga eksponenti i botës së krimit, Emiljano Shullazi.
Ngjarja mendohet të ketë ndodhur fundjavën e kaluar përpara njërës prej kamerave të sigurisë në ambjentetet e Hotel “Sheraton” në Tiranë.
Kërcënimi i rektorit të Universitetit të Tiranës, Dhori Kule, nga Emiljano Shullazi, është filmuar nga një kamera sigurie. Ngjarja ka ndodhur fundjavën e kaluar përpara njërës prej kamerave të sigurisë së një hoteli me 5 yjë në Tiranë. Këtë fakt e konfirmuan burime të prokurorisë.
Burime pranë prokurorisë konfirmojnë se pamjet filmike tregojnë momentin kur Shullazi dhe Kule janë përballur me njëri – tjetrin. Mësohet se Kules i është kërkuar që të mos mbështesë Mynyr Konin në garën përballë Klodeta Dibrës.
Ndërkohë edhe Mynyr Koni është kërcënuar për tu tërhequr nga gara për rektor në zgjedhjet e Universitetit të Tiranës.
Sipas burimeve të prokurorisë, disa persona i kanë zënë fillimisht rrugën Mynyr Konit dhe kanë tentuar ta fusin në makinë. Më pas ata i kanë kërkuar që të nesërmen e asaj dite, të dorëhiqet nga gara për rektor në UT.
“Do të mendohem deri nesër”, mësohet se u është përgjigjur pedagogu. “Dorëhiqu nesër” ka vijuar kërcënimi nga njëri prej personave në makinë.
