Prokuroria e Krimeve të Rënda ka nisur hetim pasuror ndaj fisit Çapja në Elbasan. Hetimet pasurore ndiqen nga seksioni i posaçëm brenda kësaj prokurorie, i ngritur në kuadër të operacionit “Forca e Ligjit”, në bashkëpunim me Ministrinë e Brendshme.
Çapjat, në fakt, kanë që prej fundit të vitit të shkuar që janë nën hetim pasuror nga Prokuroria e Krimeve të Rënda. Ka dyshime se pasuritë e tyre mund të jenë vendosur me aktivitet të paligjshëm.
Bëhet fjalë për një sërë pasurish të paluajtshme që rezultojnë në emër të Çapjave dhe të afërmve të tjerë të tyre. Kështu, sipas një dokumenti të majit të këtij viti të Krimeve të Rënda, mes personave që janë nën hetim pasuror përmenden: Arian Çapja, Florenc Çapja, Bledar Muça, Enver Çapja, Fejzullah Çapja etj..
Në dokument, Prokuroria e Krimeve të Rënda kërkon informacion nga Gjendja Civile për të gjithë personat e përmendur, duke tentuar më pas të gjejnë pasuritë që ata kanë.
Dyshimet e Task-Forcës dhe Prokurorisë janë që këto pasuri nuk justifikojnë burimin e të ardhurave dhe mund të kenë ardhur nga trafiku i drogës.
