FIFA ka caktuar ditën e sotme edhe arbitrat që do të gjykojnë në dy gjysmëfinalet e ditës së martë dhe të mërkurë.
Në ndeshjen mes Francës dhe Belgjikës, do të vendosë drejtësi uruguaiani Andres Kunja.
Mund të thuhet se është një tjetër gafë e FIFA-s, pasi francezët eliminuan Uruguain në çerekfinale dhe do të gjykohen në ndeshjen pasardhëse pikërisht nga një uruguaian.
Kujtojmë që edhe në çerekfinale pati një dyshim, pasi Franca eliminoi Argjentinën dhe me Uruguain u gjykua nga një argjentinas.
Për fat, nuk pati asnjë kontestim dhe tashmë shpresohet që edhe këtë herë, me gjithë gabimin e përsëritur nga FIFA, të mos ketë probleme.
Ndërkohë, gjysmëfinalja tjetër, mes Anglisë dhe Kroacisë, i është besuar turkut Cunej Çakir.
Kështu, për finalen e madhe të Moskës, mbetet e hapur rruga për dy xhaketat e zeza, të cilësuar nga më të mirët në këtë Botëror, italiani Xhianluka Roki dhe serbi Milorad Maziç.
Gjithashtu, në garë për të pasur në gjykim finalen është edhe iraniani Alireza Fagani.
