Kush është biri/bija juaj? Është një fëmijë. Dhe çfarë është një fëmijë? Një fëmijë është një qenie, ndryshe nga një i rritur, si në aftësinë intelektuale, përvojat e jetës dhe ndjenjat.
Të mos rrihet fëmija është rregulli i parë i sjelljes së mirë të një prindi, në qoftë se ai ka për qëllim të respektojë identitetin e fëmijës së tij.
Një shuplakë mbetet gjithmonë një shuplakë!
Prandaj, nga pikëpamja e “viktimës”, një shuplakë e dobët mund të jetë shumë e fortë dhe e fuqishme për fëmijën.
Mos i rrihni fëmijët sepse çdo shuplakë ose goditje është shenjë dallimi midis prindit dhe fëmijës, fëmija mendon se prindi është i pamposhtur, superior dhe madje edhe i padurueshëm. Këto e vendosin fëmijën në një pozicion të humbësit në raport me prindin.
Fëmija i rrahur nuk mund të reagojë në mënyrë të barabartë me duart e mëdha, me një forcë të krahasueshme me atë të prindit, nuk ka të njëjtën shtysë. Dhe në këtë pikë fëmija mbyllet në vetvete, hesht, qan, nuk e mbron veten dhe dridhet. Por falja e fëmijës nuk është një dorëzim, është thjesht frikë.
Shuplaka që i jepni sot fëmijës për një sjellje të gabuar apo të bezdisshme, nuk e bën atë të kuptojë botën, një qëndrim apo rrethanë, por thjesht gjeneron tek ai një frikë kaq të madhe sa ta detyrojë të “ndalojë”.
Të ndalosh një veprim nuk është e njëjtë si ta kuptosh atë.
Por padyshim që sjelljet e gabuara të fëmijës duhet të ndalen. Këtu bie dakord çdo prind dhe çdo edukator. Por nuk është dhuna e ushtruar mbi të, rruga e duhur.
Ndaj bisedoni me fëmijën, në mënyrë që ai të shprehë nevojat e tij. Shpjegojani me durim se përse një sjellje e caktuar është e gabuar dhe cilat janë pasojat që sjell. Vetëm në këtë mënyrë ai do të mirëedukohet dhe në të ardhmen nuk do të gjenerojë dhunë për të arritur gjëra. Por do të përdorë komunikimin si armën më të fortë për të ecur në jetë.
Burimi: Vita da Mamma
