Në orën 11:00 të ditës së sotme nisën në ambientet e stadiumit “Selman Stërmasi” homazhet për ish-futbollistin e Tiranës, Skënder Hyka, i cili ndërroi jetë dje në moshën 74-vjeçare.
Hyka lindi në vitin 1944 dhe e kaloi të gjithë karrierën e tij sportive në klubin e vendlindjes, Tirana (17 Nëntori i asaj kohe), në rolin e sulmuesit.
Ai ka luajtur edhe për ekipin kombëtar.
Prej vitit 2009 ka qenë kreu i Komisionit të Konkurrencës, ndërsa ishte pjesë e Komitetit Ekzekutiv të Federatës Shqiptare të Futbollit.
Në homazhet për ikonën e klubit bardheblu morën pjesë figura të shquara të sportit dhe të fushave të tjera. Gjithashtu i pranishëm në homazhet për Skënder Hykën ishte dhe presidenti i FSHF-së, Armand Duka, i shoqëruar nga zyrtarë të këtij institucioni.
