Jani Zaka, pronari i parkingut 1200 m2 te Policia Bashkiake, ka pretenduar se ka marrë kërcënime nga Emiljano Shullazi në lidhje me parkingun.
Ndërkohë, pas kërcënimeve ai ka ikur nga Shqipëria, por, sipas dëshmive, del se kërcënimet e presionet kanë vazhduar ndaj Mitri Priftit, kushëri i biznesmenit Jani Zaka. Dy dëshmitarët pretendojnë se konflikti ka nisur fillimisht me shtetasin Fatmir Sinanaj, diku në 2011.
Dëshmia kryesore që ndodhet në dosjen e Prokurorisë së Krimeve të Rënda ndaj Emiljano Shullazit, kushëririt të tij, Blerim Shullazi dhe të arrestuarit tjetër, Gilmando Dani.
Shtetasi Fatmir Sinanaj i ka shitur Jani Zakës për 250300 mijë euro parkingun 1200 m2, por më pas ka ndryshuar mendje dhe ka kërkuar para të tjera me idenë se prona kushtonte më tepër sesa çmimi me të cilin ishte shitur. Jani Zaka pretendon se nuk ka hapur rrugë dhe këtu, sipas tij dhe kushëririt të tij, kanë nisur kërcënimet nga Emiljano Shullazi dhe njerëzit e tij.
Ndërkohë kallëzimet e biznesmenit dhe kushëririt të tij janë marrë nga Drejtoria e Policisë së Tiranës në datat 2 dhe 3 shkurt 2016.
Dëshmia e Jani Zakës
Jam banor i Tiranës dhe kam adresën dhe gjeneralitetet e sipërpërmendura. Para disa vitesh, te Nesharaku unë kam blerë nga shtetasi Fatmir Sinanaj një parking nëntokësor me sipërfaqe 1200 m2, për një vlerë 300.000 euro. Parkingun unë e kam blerë me kontratëporosi, pasi pallati është i pahipotekuar. Fatmiri, pasi më bëri shitjen, më ka thënë se parkingu kushtonte më shumë seç ia kisha blerë unë dhe unë i kam thënë se në qoftë se më kthente lekët, në çdo moment do t’ia ktheja pronën këtij shtetasi. Para dy ose tre muajsh më ka ardhur te garazhi një person i gjatë, të cilit unë nuk ia di emrin dhe më thotë që të kërkon Emiljano Shullazi. Unë i kam thënë që ndodhem jashtë Tirane dhe me t’u kthyer do të njoftoj vetë. Ditën e enjte, por si datë nuk më kujtohet jam kthyer në Tiranë dhe kam marrë në telefon personin që më mori dhe ai më thotë që jam te lagjja afër shtëpisë së Emiljanos.
Unë kam vajtur dhe jam ulur në një lokal të bardhë dhe personi më ka thënë prit ta njoftoj. Pasi prita pak, personi më thotë që nuk vjen sot, por mbaje telefonin hapur se nëse do të njoftojë ai vetë. Ditën tjetër më telefon rreth orës 13:00 ky person, por si datë nuk më kujtohet, dhe më thotë që po të presim te lokali mbrapa Xhakes. Unë kam vajtur te lokali dhe atje ishte dhe Emiljanua, i cili më priste në lokal. Emiljanua me thotë “çfarë garazhi i ke mbajtur peng Fatmirit”? Unë i kam thënë që nuk i kam mbajtur peng garazh, por më ka shitur garazh dhe ai më thotë zgjidheni me Fatmirin këtë problem. Për këtë gjë unë kam vënë në dijeni dhe kushëririn tim Mitri Prifti. Dua të theksoj se dje në datë 01.02.2016, rreth orës 13:00, unë jam takuar me Emiljanon tek i njëjti lokal, pasi më njoftoi kushuriri i tij dhe ai më tha që zgjidheni problemin me Fatmirin shpejt.
A keni gjë tjetër për të shtuar?
Jani Zaka: Nuk kam gjë tjetër për të shtuar. Procesverbalin, pasi e lexoj, e gjej të rregullt dhe e firmos pa vërejtje.
Bold News
