Komisioni për Punë të Jashtme i Kongresit Amerikan ka miratuar një Rezolutë që dënon dhe denoncon ekzekutimin e vëllezërve Bytyçi, në vitin 1999 në Serbi. Lajmin e ka bërë me dije Presidenti i Kosovës, Hashim Thaçi. Pak ditë më parë Thaçi kishte dekoruar tre vëllezërit Bytyçi, Yllin, Mehmetin dhe Agronin, me urdhrin “Heroi i Kosovës” për trimërinë dhe sakrificën e tyre gjatë luftës.
“Kosova dhe Shtetet e Bashkuara të Amerikës kanë shumë heronj të përbashkët, të cilët kanë luftuar dhe kanë dhënë jetën e tyre për vlerat dhe idealet e njëjta”, përfundon Thaçi.
Tre dëshmorët e lirisë, që kishin shkuar si vullnetarë për t’iu bashkuar Ushtrisë Çlirimitare të Kosovës, si pjesë e Batalionit Atlantiku, u ekzekutuan nga Serbia pa gjyq, në mënyrë të paligjshme dhe në kohë paqeje.
Familja Bytyçi ka pasur një numër kongresistësh që e kanë mbështetur shumë çështjen e tyre. Një nismëtar dhe mbështetës i palëkundur ka qenë kongresisti Lee Zeldin, i Distriktit të parë të Nju Jorkut.
Bashkë me të njohurin Eliot Engel, bashkëkryetar i Kaukusit të Çështjeve Shqiptare dhe Kryetarit të Komitetit për Marrëdhënie me Jashtë, Republikanit Ed Royce, nga California, ata e kanë mbajtur çështjen gjallë, duke mos lejuar që normalizimi i lidhjeve SHBA-Serbi të bëjë që të harrohen krimet e viteve 1990.
